വുഹാന്‍: ഇന്ത്യയുടെ സൈന നേഹ്‌വാള്‍, പി.വി സിന്ധു, കിഡംബി ശ്രീകാന്ത്, മലയാളി താരം എച്.എസ് പ്രണോയ് എന്നിവര്‍ ബാഡ്മിന്റണ്‍ ഏഷ്യ ചാംപ്യന്‍ഷിപ്പിന്റെ ക്വാര്‍ട്ടറിലേക്ക് മുന്നേറി. കടുത്ത പോരാട്ടത്തില്‍ ചൈനയുടെ ഗാവോ ഫങ്ജിയെ കീഴടക്കിയാണ് സൈന അവസാന എട്ടില്‍ സ്ഥാനമുറപ്പിച്ചത്. സ്‌കോര്‍: 21-18, 21-8.
മൂന്നാം സിഡ് സിന്ധു ചൈനീസ് താരം ചെന്‍ സിയാസിനെയാണ് പ്രീ ക്വാര്‍ട്ടറില്‍ വീഴ്ത്തിയത്. സ്‌കോര്‍: 21-12, 21-15.
ലോക ഒന്നാം നമ്പര്‍ താരം കെ ശ്രീകാന്തിന് വാക്കോവര്‍ ലഭിക്കുകയായിരുന്നു. ഹോങ്കോങ് താരം വോങ് വിങ് കി വിന്‍സന്റ് മത്സരം മുഴുമിപ്പിക്കാതെ പിന്‍മാറിയതോടെയാണ് ശ്രീകാന്ത് അടുത്ത ഘട്ടത്തിലേക്ക് കടന്നത്. ആദ്യ സെറ്റില്‍ 2-7 എന്ന നിലയില്‍ നില്‍ക്കേയാണ് ഹോങ്കോങ് താരത്തിന്റെ പിന്‍മാറ്റം. ക്വാര്‍ട്ടറില്‍ മലേഷ്യന്‍ ഇതിഹാസം ലീ ചോങ് വിയാണ് ശ്രീകാന്തിന്റെ എതിരാളി.
ഒരു സെറ്റ് കൈവിട്ട ശേഷമാണ് മലയാളി താരം പ്രണോയിയുടെ മുന്നേറ്റം. ചൈനീസ് തായ്‌പേയ് താരം വാങ് സു വിക്കെതിരായ പ്രീ ക്വാര്‍ട്ടറില്‍ 16-21, 21-14, 21-12 എന്ന സ്‌കോറിനാണ് പ്രണോയ് വിജയം സ്വന്തമാക്കിയത്. കൊറിയന്‍ താരം സന്‍ വാന്‍ ഹോയാണ് പ്രണോയിയുടെ അവസാന എട്ടിലെ എതിരാളി. അതേസമയം പുരുഷ സിംഗിള്‍സില്‍ മത്സരിച്ച സായ് പ്രണീത് ഒളിംപിക് ചാംപ്യന്‍ ചെന്‍ ലോങിനോട് പരാജയപ്പെട്ട് പുറത്തായി. ഇന്ത്യയുടെ പുരുഷ, വനിതാ ഡബിള്‍സ് ടീമുകള്‍ക്കും മികച്ച പ്രകടനം പുറത്തെടുക്കാന്‍ സാധിച്ചില്ല.