തൊടുപുഴ: തൊടുപുഴയാറില്‍ കോളിഫോം ബാക്ടീരിയകളുടെ അളവ് ക്രമാതീതമായി വര്‍ധിച്ച സാഹചര്യത്തില്‍ നഗരസഭാ സെക്രട്ടറിയോടു മനുഷ്യാവകാശ കമ്മിഷന്‍ റിപ്പോര്‍ട്ട് തേടി. സംസ്ഥാന മനുഷ്യാവകാശ കമ്മിഷന്‍ പി.മോഹന്‍ ദാസിന്റെ അധ്യക്ഷതയില്‍ തൊടുപുഴയില്‍ ചേര്‍ന്ന സിറ്റിംഗില്‍ തൊടുപുഴയാറില്‍ കോളിഫോം ബാക്ടീരിയകളുടെ അളവ് ക്രമാതീതമായി വര്‍ധിച്ചതായി ഡിഎംഒ റിപ്പോര്‍ട്ട് നല്‍കിയിരുന്നു. വന്‍ തോതിലുള്ള മാലിന്യ നിക്ഷേപമാണ് ബാക്ടീരയയുടെ അളവ് വര്‍ധിക്കാന്‍ കാരണമെന്ന് റിപ്പോര്‍ട്ടില്‍ ചൂണ്ടിക്കാട്ടിയിട്ടുണ്ട്. ആരോഗ്യ വിഭാഗം ടെക്‌നിക്കല്‍ അസിസ്റ്റന്റ് കെ.എന്‍ വിനോദാണ് ഇത് സംബന്ധിച്ച് അന്വേഷണം നടത്തി റിപ്പോര്‍ട്ട് ഡി.എം.ഒയ്ക്ക് കൈമാറിയത്.
നഗരസഭാ അതിര്‍ത്തിയിലെ അഞ്ച് പ്രധാന ഓടകളില്‍ നിന്നും വിവിധ ഹോട്ടലുകള്‍, വീടുകള്‍, ഇതര സ്ഥാപനങ്ങള്‍, എന്നിവടങ്ങളില്‍ നിന്നും മലിന ജലം പുഴയിലേക്ക് ഒഴുകി എത്തുന്നതായി റിപ്പോര്‍ട്ടില്‍ പറയുന്നു. കൂടാതെ മത്സ്യ മാംസ അവശിഷ്ടങ്ങളും പുഴയില്‍ തള്ളുന്നത് ശ്രദ്ധയില്‍പ്പെട്ടിട്ടുണ്ട്. തൊടുപുഴ നഗരത്തിലെ കേന്ദ്രീകൃത മാലിന്യ സംസ്‌കരണ പദ്ധതി പലയിടത്തും പരാജയപ്പെട്ടു. തൊടുപുഴയാറിന്റെ ഹൃദയ ഭാഗത്ത് കൂടി ഒഴുകുന്ന പുഴ ജല സമൃദ്ധമാണ്. പുഴയില്‍ മാലിന്യം തള്ളുന്നവരെ കണ്ടെത്താന്‍ കാമറകളടക്കം സ്ഥാപിച്ചങ്കെിലും മാലിന്യം തള്ളുന്നവരുടെ എണ്ണത്തില്‍ കുറവൊന്നും വന്നിട്ടില്ല. പിടിക്കപ്പെട്ടാല്‍ പിഴയടച്ച് രക്ഷപ്പെടുകയാണ് ചെയ്യന്നത്. ശക്തമായ നടപടിയുമായി നഗരസഭ ആദ്യമൊക്കെ രംഗത്തിറങ്ങിയെങ്കിലും ഇപ്പോള്‍ നടപടി കൈക്കൊള്ളുന്ന കാര്യത്തില്‍ നിസംഗത പുലര്‍ത്തുകയാണെന്ന് ആക്ഷേപമുണ്ട്.
100 മില്ലി വെള്ളത്തില്‍ ഒരുകോളിഫോം ബാക്ടീരിയയുടെ സാന്നിധ്യംപോലും മലിനീകരണമാണെന്നിരിക്കെ തൊടുപുഴയാറ്റിലെ ചില പ്രദേശങ്ങളില്‍ ഏഴു ബാക്ടീരിയകളാണ് രേഖപ്പെടുത്തിയത്.