സുല്‍ത്താന്‍പൂര്‍: പ്രധാനമന്ത്രി നരേന്ദ്ര മോദി ദലിത് വിരുദ്ധനാണെന്ന ആരോപണവുമായി ബി.എസ്.പി നേതാവ് മായാവതി. ഉത്തര്‍പ്രദേശിലെ സുല്‍ത്താന്‍പൂരില്‍ തെരഞ്ഞെടുപ്പ് റാലിയില്‍ പ്രസംഗിക്കുകയായിരുന്നു അവര്‍.
സംസ്ഥാനത്ത് ബി.എസ്.പിക്കുണ്ടാകുന്ന ജനകീയതയില്‍ വിറളിപൂണ്ടാണ് അദ്ദേഹം തങ്ങള്‍ക്കെതിരേ ആരോപണം ഉന്നയിക്കുന്നതെന്ന് അവര്‍ ആരോപിച്ചു. ബെഹന്‍ജിയുടെ സ്വന്തം പാര്‍ട്ടിയെന്നാണ് ഇന്നലെ തെരഞ്ഞെടുപ്പ് റാലിയില്‍ മോദി പരാമര്‍ശിച്ചത്. ഇതിനോട് പ്രതികരിച്ചുകൊണ്ടാണ് മായാവതി മോദിയെ ദലിത് വിരുദ്ധനെന്ന് വിശേഷിപ്പിച്ചത്.ഇന്ത്യയിലെ ഹാസ്യകഥാപാത്രമാണ് മോദി. അതുകൊണ്ടാണ് ആര് എന്ത് പറഞ്ഞാലും അപ്പോള്‍ തന്നെ അദ്ദേഹത്തിന് തമാശയിലൂടെ മറുപടി നല്‍കാന്‍ കഴിയുന്നത്. പറയുന്ന കാര്യങ്ങളൊന്നും പിന്നീട് അദ്ദേഹത്തിന് ഓര്‍മയുണ്ടാകാറില്ലെന്നും മായാവതി പരിഹസിച്ചു.