ദുബൈ: ദുബൈയിൽ അവധിക്കാലം ആഘോഷിക്കാനെത്തിയ കൗമാരക്കാരിക്ക് സ്വന്തം ജന്മദിനത്തിൽ ജെറ്റ് സ്കീ അപകടത്തിൽ ദാരുണാന്ത്യം. മൗറീഷ്യസിൽ നിന്നുള്ള പതിനെട്ടുകാരിയാണ് തന്റെ 18-ാം പിറന്നാൾ ദിനത്തിൽ കടലിൽ മുങ്ങിമരിച്ചത്. കൂടെയുണ്ടായിരുന്ന ബന്ധുവായ മറ്റൊരു കൗമാരക്കാരി ഗുരുതര പര‌ുക്കുകളോടെ രക്ഷപ്പെട്ടു.

മൗറീഷ്യസിൽ നിന്നുള്ള 17-ഉം 18-ഉം വയസ്സുള്ള രണ്ട് പെൺകുട്ടികൾ അവധിക്കാലം ആഘോഷിക്കാനും മൂത്ത പെൺകുട്ടിയുടെ പതിനെട്ടാം ജന്മദിനം കൊണ്ടാടാനുമാണ് ദുബൈയിൽ എത്തിയത്.

കടലിൽ ജെറ്റ് സ്കീ നടത്തുന്നതിനിടയിൽ, മടങ്ങുന്ന വഴിയിൽ ഇരുവരും പരസ്പരം സീറ്റുകൾ മാറി ഇരുന്നു. പുതുതായി ജെറ്റ് സ്കീ ഓടിക്കാൻ തുടങ്ങിയ പെൺകുട്ടിക്ക് വേഗത കൂടിയപ്പോൾ നിയന്ത്രണം നഷ്ടമാവുകയും, ജെറ്റ് സ്കീ ശക്തമായി ബ്രേക്ക് വാട്ടറിലെ പാറക്കൂട്ടങ്ങളിൽ ഇടിച്ച് കയറുകയുമായിരുന്നു. ഇടിയുടെ ആഘാതത്തിൽ രണ്ട് പേരും കടലിലേക്ക് തെറിച്ചുവീണു. പിറന്നാൾ ആഘോഷിച്ചിരുന്ന പെൺകുട്ടി സംഭവസ്ഥലത്ത് തന്നെ മുങ്ങിമരിച്ചു. 

അപകടവിവരമറിഞ്ഞ് ദുബൈ പൊലിസിന്റെ മറൈൻ റെസ്ക്യൂ ടീം ഉടനടി സ്ഥലത്തെത്തി രക്ഷാപ്രവർത്തനം നടത്തി. പാറക്കൂട്ടങ്ങൾക്കിടയിൽ കുടുങ്ങിക്കിടന്ന രണ്ടാമത്തെ പെൺകുട്ടിയെ അതീവ ഗുരുതരാവസ്ഥയിലാണ് രക്ഷാപ്രവർത്തകർ പുറത്തെടുത്തത്. കാലിന് ഗുരുതരമായി പരുക്കേറ്റ കുട്ടിയെ ഉടൻ തന്നെ ആശുപത്രിയിലെത്തിച്ചു.

ആശുപത്രിയിൽ പ്രവേശിപ്പിച്ച കുട്ടിക്ക് ഒന്നിലധികം അടിയന്തര ശസ്ത്രക്രിയകൾ വേണ്ടിവന്നു. ദുബൈ പൊലിസിന്റെ സമയബന്ധിതമായ ഇടപെടൽ മാത്രമാണ് കുട്ടിയുടെ ജീവൻ നിലനിർത്തിയത്. 

ആശ്വാസമേകി ദുബൈ പൊലിസിന്റെ സപ്പോർട്ട് ടീം

കേവലം അന്വേഷണം നടത്തുക എന്നതിനപ്പുറം അപകടബാധിതർക്കും അവരുടെ കുടുംബങ്ങൾക്കും മാനസികവും ഔദ്യോഗികവുമായ പിന്തുണ നൽകുന്നതിൽ ദുബൈ പൊലിസിന്റെ വിക്ടിം സപ്പോർട്ട് ടീം (Victim Support Team) മാതൃകാപരമായ പ്രവർത്തനമാണ് നടത്തിയത്.

"അവൾ വളരെ ചെറുപ്പമായിരുന്നു. സന്തോഷത്തോടെ ആഘോഷിക്കേണ്ട ഒരു ജന്മദിനത്തിലാണ് കുടുംബത്തിന് ഈ ദുരന്തം നേരിടേണ്ടി വന്നത്. ഞങ്ങൾ കൈകാര്യം ചെയ്തതിൽ ഏറ്റവും ഹൃദയഭേദകമായ കേസാണിത്." ദുബൈ പൊലിസ് പോർട്ട് സ്റ്റേഷൻ വിക്ടിം സപ്പോർട്ട് ടീം തലവനായ മീര അൽ ഹദാദ് പറഞ്ഞു.

കുടുംബത്തിന് ആവശ്യമായ എല്ലാ സഹായങ്ങളും ആശുപത്രി നടപടികളും പൊലിസ് സുഗമമാക്കി. വിദേശ രാജ്യങ്ങളിൽ നിന്നെത്തുന്ന വിനോദസഞ്ചാരികൾ ഇത്തരം അപകടങ്ങളിൽ പെടുമ്പോൾ അവർക്ക് പ്രത്യേക പരിഗണനയും പരിചരണവും നൽകാൻ തങ്ങളുടെ സംഘം എപ്പോഴും സന്നദ്ധരാണെന്ന് ദുബൈ പൊലിസ് പോർട്ട് സ്റ്റേഷൻ ഡയറക്ടർ ബ്രിഗേഡിയർ ഡോ. ഹസ്സൻ സുഹൈൽ അൽ സുവൈദി വ്യക്തമാക്കി.

ഇതോടൊപ്പം കടലിൽ ജോലി ചെയ്യുന്നതിനിടെ ഉണ്ടായ മറ്റൊരു അപകടത്തിൽ കാലിന് ഗുരുതരമായി പരുക്കേറ്റ ഒരു നാവികന്റെ ജീവനും കാലും രക്ഷിച്ച കാര്യവും ഫസ്റ്റ് ലെഫ്റ്റനന്റ് മീര ഓർമ്മിച്ചു. കപ്പലിലെ കയർ കാലിൽ കുരുങ്ങി കാലറ്റുപോകുമായിരുന്ന നാവികനെ ആശുപത്രിയിലെത്തിക്കുകയും അടിയന്തര ശസ്ത്രക്രിയയിലൂടെ കാല് വിജയകരമായി കൂട്ടിച്ചേർക്കുകയും ചെയ്തു. സുഖം പ്രാപിച്ച ശേഷം ഈ നാവികൻ പൊലിസ് ഉദ്യോഗസ്ഥർക്ക് നേരിട്ടെത്തി നന്ദി അറിയിച്ചിരുന്നു.

ALSO READ: യുഎഇയിലെ പ്രവാസികളുടെ പാസ്‌പോർട്ട് പ്രതിസന്ധി; ഫീസ് വർദ്ധനവ് പിൻവലിക്കണമെന്നും സേവനങ്ങൾ കാര്യക്ഷമമാക്കണമെന്നും ആവശ്യപ്പെട്ട് ഇന്ത്യൻ സംഘടനകൾ

A birthday celebration ended in tragedy after a teenage girl died in a jet ski accident in Dubai, while her relative suffered serious injuries, prompting an investigation into the incident.