ബദിയഡുക്ക: ഹര്‍ത്താലിനെ തുടര്‍ന്നുണ്ടായ അക്രമത്തെ കുറിച്ച് പൊലിസ് അന്വേഷണം ആരംഭിച്ചു. പൈക്ക മാളങ്കൈയിലെ അച്യുതനെ മര്‍ദിച്ചതിന് പൈക്കയിലെ ദിനേഷ്, മഹേഷ്, പ്രകാശ് തുടങ്ങി 28 പേര്‍ക്കെതിരേ ബദിയഡുക്ക പൊലിസ് കേസെടുത്തു. ഹര്‍ത്താല്‍ ദിനത്തില്‍ സഹോദരന്റെ മകന്‍ ഓടിച്ച സൈക്കിള്‍ തടഞ്ഞതിനെ ചോദ്യം ചെയ്തതിന്റെ വൈരാഗ്യത്തില്‍ വീട് കയറി അക്രമിച്ചുവെന്നാണ് പരാതി. അര്‍ലടുക്കയിലെ ശരത്(23), ബാലടുക്കയിലെ ഹര്‍ഷിദ് (21)എന്നിവര്‍ക്കും പരുക്കേറ്റു. ഹര്‍ഷിദിന്റെ പരാതിയില്‍ മഞ്ചു, മഹേഷ്, മല്ലേഷ് തുടങ്ങി 25 പേര്‍ക്കെതിരേ കേസെടുത്തു. ബി.ജെ.പി പ്രവര്‍ത്തകരായ കൃഷണന്‍ (35), സുനില്‍ (32) എന്നിവര്‍ മംഗളുരുവിലെ സ്വകാര്യാശുപത്രിയില്‍ ചികിത്സ തേടി. അര്‍ലടുക്കയില്‍ ഡി.വൈ.എഫ്.ഐയുടെ നേതൃത്വത്തില്‍ പണിത വിശ്രമ കേന്ദ്രം ഹര്‍ത്താല്‍ അനുകൂലികള്‍ തകര്‍ത്തു. ബി.ജെ.പിയുടെ മൂന്നു കൊടിമരങ്ങള്‍ നശിപ്പിച്ചതായും പരാതിയുണ്ട്. ബദിയഡുക്ക ടൗണില്‍ റോഡ് തടസപ്പെടുത്തിയതിന് ഹരീഷ് നാരമ്പാടി, അവിനാശ് റൈ, വിശ്വനാഥ പ്രഭു, രാജേഷ് തുടങ്ങി 61പേര്‍ക്കെതിരേ കേസെടുത്തു. നീര്‍ച്ചില്‍ സംഘര്‍ഷം ഉണ്ടാക്കുന്ന രീതിയില്‍ പ്രവര്‍ത്തിച്ചുവെന്നതിന് മല്ലടുക്കയിലെ ബാലകൃഷ്ണ മണിയാണി(42), കടമ്പളയില്‍ നായമ്മാര്‍മൂലയിലെ നാസര്‍, കുഞ്ചാറിലെ താഹിര്‍( 32) എന്നിവരെയും അറസ്റ്റു ചെയ്തു. ബോവിക്കാനത്ത് സംഘം ചേര്‍ന്ന് സംഘര്‍ഷമുണ്ടാക്കാന്‍ ശ്രമിച്ചതിന് കണ്ടാലറിയാവുന്ന 50പേര്‍ക്കെതിരേ പൊലിസ് സ്വമേധയാ കേസെടുത്തു. ബി.ജെ.പി പ്രവര്‍ത്തകന്‍ രാജേഷിനെ മര്‍ദിച്ചുവെന്ന പരാതിയില്‍ മുഹമ്മദലി, ജാഫര്‍, ജമാലുദ്ദീന്‍ തുടങ്ങി 15 പേര്‍ക്കെതിരേയും മുഹമ്മദലിയുടെ പരാതിയില്‍ രാജേഷ് തുടങ്ങി 15പേര്‍ക്കെതിരേയും കേസെടുത്തു.