വാഷിങ്ടണ്‍: ഭൂമിക്കു സമാനമായ ഏഴുഗ്രഹങ്ങള്‍ കണ്ടെത്തിയതായി അന്താരാഷ്ട്ര ബഹിരാകാശ ശാസ്ത്രസംഘം. കുള്ളന്‍ ഗ്രഹത്തെ ഭ്രമണം ചെയ്യുന്ന ജീവന്‍ സാധ്യമായ മറ്റൊരു സൗരയൂഥമാണു കണ്ടെത്തിയിരിക്കുന്നത്. നെതര്‍ലന്‍ഡ് ആസ്ഥാനമായ ശാസ്ത്രസംഘമാണ് നേച്ചര്‍ ജേണലില്‍ പ്രസിദ്ധീകരിച്ച പഠനത്തില്‍ ഇക്കാര്യം വ്യക്തമാക്കിയത്.
സൂര്യനെയല്ലാതെ മറ്റൊരു നക്ഷത്രത്തെ ചുറ്റുന്ന ഗ്രഹങ്ങളാണ് ഇവയെന്നാണു ശാസ്ത്രസംഘം സൂചിപ്പിക്കുന്നത്. ജീവന്‍ നിലനില്‍ക്കുന്ന ഏക ഗ്രഹം ഭൂമിയാണെന്ന വാദം തള്ളിക്കളയുന്നതാണു പുതിയ കണ്ടുപിടിത്തം. 40 പ്രകാശ വര്‍ഷങ്ങള്‍ക്കകലെയാണു പുതിയ സൗരയൂഥം നിലനില്‍ക്കുന്നത്. ഇതില്‍ ഏറ്റവും ഉള്‍ഭാഗത്തെ മൂന്നു ഗ്രഹങ്ങളില്‍ ജലസാന്നിധ്യമുണ്ടാകുമെന്നാണു ശാസ്ത്രജ്ഞരുടെ വിലയിരുത്തല്‍. എന്നാല്‍ ഇവ പരിമിതമായിരിക്കുമെന്നും പറയുന്നു. മറ്റു മൂന്നു ഗ്രഹങ്ങള്‍ ആവാസയോഗ്യമായ പരിധിയിലാണെന്നും പഠനത്തില്‍ പറയുന്നു.
ഭൂമിയുടെ ഏഴു സഹോദരിമാര്‍ എന്നാണ് ഇവയ്ക്കു പേരിട്ടിരിക്കുന്നത്. ഭൂമിക്കുസമാനമായി ഈ ഗ്രഹങ്ങളില്‍ ലോഹങ്ങളുടെയും പാറക്കഷ്ണങ്ങളുടെ സാന്നിധ്യമുണ്ട്. പുതിയ സൗരയൂഥത്തിന്റെ കേന്ദ്രമായ ചെറുനക്ഷത്രം(ട്രാപ്പിസ്റ്റ് -1) സൂര്യനേക്കാള്‍ പത്തിലൊന്നു വലിപ്പം മാത്രമാണുള്ളത്. എന്നാല്‍ സൂര്യനേക്കാള്‍ നാലിലൊന്ന് ചൂട് ഇതിനുണ്ട്.