തിരുവനന്തപുരം: പൗരത്വ വിഷയത്തിലുള്ള നിലപാട് ഗവര്‍ണറുടെ നയപ്രഖ്യാപന പ്രസംഗത്തില്‍ ഉള്‍പ്പെടുത്തണമെന്ന് ആവശ്യപ്പെട്ട് പ്രതിപക്ഷനേതാവ് രമേശ് ചെന്നിത്തല മുഖ്യമന്ത്രിക്ക് കത്ത് നല്‍കി.
സര്‍ക്കാരിന്റെ നയ നിലപാടുകള്‍ പ്രഖ്യാപിക്കുന്ന നിയമസഭാ സമ്മേളനത്തിലെ നയപ്രഖ്യാപന പ്രസംഗത്തില്‍ പ്രതിപക്ഷം നിര്‍ദേശം വെയ്ക്കുന്നത് ആദ്യമായിട്ടാണ്.
ഭരണഘടനാ വിരുദ്ധമായ 2019ലെ പൗരത്വ നിയമ ഭേദഗതി റദ്ദാക്കണമെന്നാവശ്യപ്പെട്ട് കേരള നിയമസഭ പാസാക്കിയ പ്രമേയത്തിലൂടെ ഇക്കാര്യത്തിലുള്ള കേരളത്തിന്റെ പൊതുവികാരം ഒറ്റക്കെട്ടായി പ്രകടിപ്പിക്കാന്‍ നമ്മുക്ക് സാധിച്ചുവെന്നും എന്നാല്‍ ഭരണഘടനയുടെ അന്തസത്ത ഇല്ലാതാക്കുന്ന നിയമം ജനങ്ങളില്‍ ഉണ്ടാക്കിയ ആശങ്ക വളരെ വലുതാണെന്നും രമേശ് ചെന്നിത്തല കത്തില്‍ എടുത്ത് പറയുന്നുണ്ട്്.
പൗരത്വവിഷയത്തില്‍ സര്‍ക്കാരിനൊപ്പം ആദ്യഘട്ടത്തില്‍ നിലകൊണ്ട പ്രതിപക്ഷം പിന്നീട് കോണ്‍ഗ്രസിനകത്ത് ഉരുതിരിഞ്ഞ അഭിപ്രായ ഭിന്നതയെ തുടര്‍ന്ന് സംയുക്തസമരങ്ങളില്‍ നിന്ന് വിട്ടുനില്‍ക്കാന്‍ തീരുമാനിക്കുകയായിരുന്നു.