നീലേശ്വരം: കുടിവെള്ളത്തിനായി മൈലുകള്‍ താണ്ടുകയാണു നീലേശ്വരം നഗരസഭയിലെ പുത്തരിയടുക്കം എം.എന്‍ ലക്ഷംവീട് കോളനിക്കാര്‍. ഇവിടെയുള്ള ഇരുപത്തിയഞ്ചോളം കുടുംബങ്ങളാണു ദുരിതമനുഭവിക്കുന്നത്. ഇവരുടെ ഏക ആശ്രയമായ പൊതുകിണര്‍ വറ്റിയതോടെയാണു ഈ സ്ഥിതി വന്നത്.
ഇവിടെ എല്ലാ വര്‍ഷവും ഡിസംബര്‍ കഴിയുന്നതോടെ കുടിവെള്ള ക്ഷാമം അനുഭവപ്പെടാറുണ്ടെന്നു പ്രദേശവാസികള്‍ പറഞ്ഞു. പലതവണ ഇക്കാര്യം അധികൃതരുടെ ശ്രദ്ധയില്‍ പെടുത്തിയെങ്കിലും പരിഹാരമുണ്ടായില്ല. നിലവില്‍ കിലോമീറ്ററുകള്‍ ദൂരെയുള്ള മറ്റൊരു കിണറും കുഴല്‍ക്കിണറുമാണു ഇവരുടെ ആശ്രയം. ഇവയിലും വെള്ളം കുറഞ്ഞുതുടങ്ങി.

തൊട്ടടുത്ത പ്രദേശങ്ങളായ ഇടിച്ചൂടിത്തട്ട്, പാണ്ടിക്കോട്ട് എന്നിവിടങ്ങളിലെ സ്ഥിതിയും വ്യത്യസ്ഥമല്ല. കഴിഞ്ഞ വര്‍ഷം ഈ പ്രശ്‌നങ്ങള്‍ ചൂണ്ടിക്കാട്ടി കലക്ടര്‍ക്കും നിവേദനം നല്‍കിയിരുന്നു. ഈ പ്രദേശങ്ങളുടെ കുടിവെള്ള ക്ഷാമം പരിഹരിക്കാന്‍ അടിയന്തിരമായി ഇടപെടലുകള്‍ ഉണ്ടാകണമെന്ന ആവശ്യം ഉയരുന്നുണ്ട്. പ്രശ്‌നത്തിനു ശാശ്വത പരിഹാരമായി കുടിവെള്ള പദ്ധതി തുടങ്ങണമെന്ന ആവശ്യവുമുണ്ട്.