ഹരിപ്പാട്: പൊതു തെരഞ്ഞെടുപ്പിന് മുന്നോടിയായി പോളിങ് ഉദ്യോഗസ്ഥര്‍ക്കുള്ള പരിശീലന പരിപാടികള്‍ക്ക് കാര്‍ത്തികപ്പള്ളി താലൂക്കില്‍ തുടക്കമായി.
ഹരിപ്പാട് ടൗണ്‍ കേന്ദ്രീകൃതമായ സര്‍ക്കാര്‍ ഓഫിസുകളിലെയും പൊതുമേഖലാ സ്ഥാപനങ്ങളിലെയും ജീവനക്കാര്‍ക്ക് താലൂക്ക് ഓഫിസില്‍ വച്ചും എന്‍.എസ്.എസ് കോളജിലെയും പരിശീലന പരിപാടി സംഘടിപ്പിച്ചു. മുന്‍ തെരഞ്ഞെടുപ്പുകളില്‍ നിന്നും വ്യത്യസ്തമായി എല്ലാ നിയോജക മണ്ഡലങ്ങളിലും വി.വി പാറ്റ് സംവിധാനത്തോടു കൂടിയ ഇലക്ട്രോണിക് വോട്ടിങ് മെഷീന്‍ ആണ് ഉപയോഗിക്കുന്നത്. ഇതിന്റെ പ്രവര്‍ത്തന രീതി ഉദ്യോഗസ്ഥരെ ബോധ്യപ്പെടുത്തുവാനുള്ള പ്രാഥമിക പരിശീലന പരിപാടിയാണ് സംഘടിപ്പിച്ചത്. ഹരിപ്പാട് ടൗണിലെ 35 ല്‍ പരം സ്ഥാപനങ്ങളിലെ ജീവനക്കാര്‍ പങ്കെടുത്തു. പരിശീലന പരിപാടിയില്‍ കാര്‍ത്തിക പള്ളി തഹസില്‍ദാര്‍ ടി.ഐ.വിജയസേനന്‍, ഇലക്ഷന്‍ ഡെ. തഹസില്‍ദാര്‍ ആര്‍.ശ്രീകുമാര്‍ , ഗോപകുമാരന്‍ പിള്ള പങ്കെടുത്തു. രാജേഷ് ചന്ദ്രന്‍, പി.കെ.നവാസ് ,വി.രാജശേഖര്‍ എന്നിവര്‍ ക്ലാസുകള്‍ക്ക് നേതൃത്വം നല്‍കി.