പാരിസ്: ലോകചാംപ്യന്‍മാരായ ജര്‍മനിക്ക് യൂറോ കപ്പില്‍ വിജയത്തുടക്കം. എതിരാളികളായ ഉക്രൈനെ എതിരില്ലാത്ത രണ്ടു ഗോളുകള്‍ക്കാണ് ജര്‍മനി പരാജയപ്പെടുത്തിയത്. 19ാം മിനുറ്റില്‍ ഷ്‌കോഡ്രാന്‍ മുസ്താഫി നേടിയ ഗോളിലൂടെ മുന്നിലെത്തിയിരുന്നു ജര്‍മനി. എന്നാല്‍, സമനില നേടാനുള്ള ഉക്രൈനിന്റെ ശ്രമങ്ങളെ ജര്‍മന്‍ പ്രതിരോധ നിര തടഞ്ഞു.
രണ്ടാം പകുതിയില്‍ കൂടുതലും ഉക്രൈനില്‍ നിന്നുള്ള മുന്നേറ്റങ്ങളാണ് കളിയില്‍ കാണാന്‍ കഴിഞ്ഞത്. ജര്‍മന്‍ പ്രതിരോധനിരയിലെ വിള്ളലുകള്‍ ഇതിനു കാരണമായി. എന്നാല്‍, ആ വിള്ളലുകളെ മറയ്ക്കുന്ന പ്രകടനമാണ് കാവല്‍ക്കാരനായ മാനുവല്‍ ന്യൂയര്‍ പുറത്തെടുത്തത്. ഉക്രൈനിന്റെ ഗോളെന്നു തോന്നിക്കുന്ന പല ഗോളുകളും ന്യൂയറിനു മുന്നില്‍ തകര്‍ന്നു.
കളി തീരാന്‍ മൂന്നു മിനിറ്റു മാത്രം ശേഷിക്കെ പകരക്കാരനായിറങ്ങിയ ക്യാപ്റ്റന്‍ ബാസ്റ്റിന് ഷ്വെയ്ന്‍സ്റ്റീഗറിന്റെ ഗോളിലൂടെ ജര്‍മനി യൂറോ കപ്പിലെ തങ്ങളുടെ ആദ്യമല്‍സരത്തില്‍ വിജയം സ്വന്തമാക്കി. കളി അവസാനിക്കാന്‍ രണ്ടു മിനുറ്റ് ശേഷിക്കെയാണ് ജര്‍മന്‍ ക്യാപ്റ്റന്‍ ഗോള്‍ നേടിയത്.