കോട്ടക്കല്‍: ഓട്ടോയില്‍ കടത്തുകയായിരുന്ന ഹവാല പണം തട്ടിയെടുക്കാനുള്ള ക്വട്ടേഷന്‍ സംഘത്തിന്റെ ശ്രമം പാളി. ഓട്ടോ ഡ്രൈവറെ സംഘം തട്ടിക്കൊണ്ടു പോയി. രണ്ടു പേര്‍ പൊലിസ് പിടിയിലായി. മൂന്നേകാല്‍ കോടി രൂപ ഓട്ടോയില്‍നിന്നു പിടിച്ചെടുത്തു.
പണം തട്ടിയെടുക്കാന്‍ ശ്രമിച്ച തൃശൂരിലെ ക്വട്ടേഷന്‍ സംഘത്തില്‍പ്പെട്ട താനൂര്‍ സ്വദേശികളായ ഷഫീഖ് (28), ഇസ്മായില്‍ (26) എന്നിവരെ കോട്ടക്കല്‍ എസ്.ഐ യൂസഫും സംഘവും അറസ്റ്റ് ചെയ്തു. ഇന്നലെ രാവിലെ 8.30ന് പെരിന്തല്‍മണ്ണ- കോട്ടക്കല്‍ റോഡിലെ വലിയപറമ്പിലാണ് നാടകീയ സംഭവങ്ങള്‍ നടന്നത്.
പണം കവരാനുള്ള ശ്രമത്തിനിടയില്‍ ക്വട്ടേഷന്‍ സംഘം സഞ്ചരിച്ച കാറിടിച്ചാണ് കുഴല്‍പ്പണം കടത്തുകയായിരുന്ന ഓട്ടോ മറിഞ്ഞത്. പണം കവരാനുളള ശ്രമങ്ങള്‍ പരാജയപ്പെട്ടങ്കിലും പണം കടത്തിയ ഓട്ടോ ഡ്രൈവറെ കാറിലെത്തിയ സംഘം തട്ടിക്കൊണ്ടുപോയി. ക്വട്ടേഷന്‍ സംഘത്തിലെ രണ്ടു പേരെ നാട്ടുകാര്‍ പിടികൂടി പൊലിസിന് കൈമാറുകയായിരുന്നു. 500 രൂപയുടെ നോട്ടുകള്‍ കെട്ടുകളാക്കി ചാക്കുകളില്‍ നിറച്ചാണ് ഓട്ടോയില്‍ സൂക്ഷിച്ചിരുന്നത്. പണവുമായെത്തിയ ഓട്ടോ ഡ്രൈവറെ ആക്രമിച്ച് ഓട്ടോയുമായി രക്ഷപ്പെടാന്‍ ശ്രമിക്കുന്നതിനിടെ പിന്നിലെത്തിയ കാര്‍ ഇടിച്ചതോടെയാണ് ആസൂത്രണം പാളിയത്. ഓട്ടോ മറിഞ്ഞതോടെ നോട്ടുകെട്ടുകള്‍ റോഡില്‍ വീണു. ഇതിനിടെ കൈയില്‍ കിട്ടിയ പണച്ചാക്കുകളുമായി ഓടി രക്ഷപ്പെടാന്‍ ശ്രമിച്ച സംഘത്തിലെ രണ്ടു യുവാക്കളെ നാട്ടുകാര്‍ പിടികൂടി.
ഇതിനിടെ ക്വട്ടേഷന്‍ സംഘം കാറുമായി രക്ഷപ്പെട്ടു. ഒപ്പം ഓട്ടോ ഡ്രൈവറെ കാറില്‍ കടത്തിക്കൊണ്ടുപോവുകയും ചെയ്തു. ഓട്ടോയില്‍ കൊണ്ടുവരുന്ന കുഴല്‍പ്പണം തട്ടിയെടുത്ത് നല്‍കിയാല്‍ 30 ലക്ഷം രൂപ നല്‍കാമെന്നായിരുന്നു വാഗ്ദാനമെന്ന് പിടിയിലായവര്‍ പൊലിസില്‍ മൊഴി നല്‍കിയതായാണ് വിവരം.
സംഭത്തിനുപിന്നില്‍ ഒരേ ക്വട്ടേഷന്‍ സംഘമാണെന്ന് തിരൂര്‍ ഡിവൈ.എസ്.പി സുരേഷ് പറഞ്ഞു.