ന്യൂഡല്‍ഹി: വടക്കുകിഴക്കന്‍ ഡല്‍ഹിയിലെ വിദ്യാര്‍ഥികള്‍ ഇന്നു പരീക്ഷാഹാളിലേക്കു പ്രവേശിക്കുകയാണ്. അവര്‍ക്ക് സി.ബി.എസ്.ഇ പത്ത്, 12 ക്ലാസുകളിലെ പരീക്ഷ ആരംഭിക്കുന്നത് ഇന്നാണ്. എന്നാല്‍, സംഘ്പരിവാര്‍ നേതൃത്വത്തില്‍ നടന്ന വംശഹത്യ കാരണം പഠിക്കാന്‍ സമയം കിട്ടിയില്ലെന്നു മാത്രമല്ല, പുസ്തകങ്ങളുമില്ല. അവയെല്ലാം നശിച്ചു. സ്‌കൂളുകളില്‍നിന്നു നല്‍കിയ ഹാള്‍ടിക്കറ്റും നഷ്ടപ്പെട്ടെന്നു വിദ്യാര്‍ഥികള്‍ പറയുന്നു.

ഇന്നു പരീക്ഷയെഴുതേണ്ട വിദ്യാര്‍ഥികളില്‍ അധികുപേരും ഇപ്പോള്‍ താമസിക്കുന്നത് സ്വന്തം വീടുകളിലല്ല. ആക്രമണം കാരണം അവര്‍ക്കു വീടൊഴിയേണ്ടിവന്നിട്ടുണ്ട്. പുസ്തകങ്ങളും മറ്റും നശിപ്പിക്കപ്പെടുകയും ചെയ്തു. ജീവിതം സാധാരണഗതിയിലായിട്ടുമില്ല. അതിനാല്‍, തങ്ങള്‍ക്കു പരീക്ഷയ്‌ക്കൊരുങ്ങാന്‍ സാധിച്ചിട്ടില്ലെന്നും വിദ്യാര്‍ഥികള്‍ പറയുന്നു.

കഴിഞ്ഞ ദിവസമാണ് പരീക്ഷ മുന്‍നിശ്ചയപ്രകാരംതന്നെ നടക്കുമെന്നു സി.ബി.എസ്.ഇ അറിയിച്ചിരുന്നത്. എന്നാല്‍, സ്‌കൂളുകള്‍ മാര്‍ച്ച് ഏഴുവരെ പ്രവര്‍ത്തിക്കില്ല.

എന്നാല്‍, ഹാള്‍ടിക്കറ്റ് ഡൗണ്‍ലോഡ് ചെയ്യാനുള്ള സൗകര്യം ഒരുക്കിയിട്ടുണ്ടെന്നാണ് സി.ബി.എസ്.ഇ വ്യക്തമാക്കുന്നത്. അതുപോലും സാധ്യമായ അവസ്ഥയിലല്ല തങ്ങളുള്ളതെന്നാണ് വിദ്യാര്‍ഥികളുടെയും രക്ഷിതാക്കളുടെയും പ്രതികരണം. അതിനാല്‍തന്നെ, വിദ്യാര്‍ഥികളില്‍ പലരും പരീക്ഷയ്‌ക്കെത്തില്ലെന്നാണ് വിവരം.