കല്‍പ്പറ്റ: വയനാട്ടിലെ ഒരു അനാഥാലയത്തിലെ അന്തേവാസികളായ പെണ്‍കുട്ടികള്‍ പീഡനത്തിനിരയായ സംഭവത്തില്‍ ആറു പ്രതികള്‍ പിടിയില്‍. ഇവര്‍ക്കെതിരേ 11 കേസുകളാണ് വിവിധ വകുപ്പുകളിലായി ചുമത്തിയിട്ടുള്ളത്. അനാഥാലയത്തിന് സമീപത്തെ കച്ചവടക്കാരായ രണ്ടുപേരും ഇവരുടെ സുഹൃത്തുക്കളായ നാലുപേരുമാണ് ഇതുമായി ബന്ധപ്പെട്ട് പിടിയിലായത്.
ഇവരുടെ അറസ്റ്റ് പൊലിസ് രേഖപ്പെടുത്തി. പൊലിസ് നടത്തിയ തിരിച്ചറിയല്‍ പരേഡില്‍ കുട്ടികള്‍ പ്രതികളെ തിരിച്ചറിഞ്ഞിരുന്നു. കുട്ടികളുടെ രഹസ്യ മൊഴി മജിസ്‌ട്രേറ്റും രേഖപ്പെടുത്തിയിരുന്നു. എന്നാല്‍, പ്രതികളെ കുറിച്ചുള്ള മറ്റ് വിവരങ്ങള്‍ ഇപ്പോള്‍ പുറത്തുവിടാനാകില്ലെന്ന് കല്‍പ്പറ്റ ഡിവൈ.എസ്.പി മുഹമ്മദ് ഷാഫി പറഞ്ഞു.
സ്‌കൂളിന് സമീപത്തെ കടകളിലൊന്നിലേക്ക് കുട്ടികളിലൊരാള്‍ കയറിപ്പോകുന്നത് കണ്ടതില്‍ അസ്വഭാവികത തോന്നിയ അനാഥാലയം ജീവനക്കാരന്‍ ഇത് അഡ്മിനിസ്‌ട്രേറ്ററെ അറിയിക്കുകയായിരുന്നു. തുടര്‍ന്ന് അനാഥാലയം അധികൃതര്‍ കുട്ടികളോട് വിവരം തിരക്കിയപ്പോഴാണ് ഇവര്‍ പീഡനത്തിനിരയായ വിവരം പുറത്തറിയുന്നത്. ഇതേ തുടര്‍ന്ന് അഡ്മിനിസ്‌ട്രേറ്റര്‍ കല്‍പ്പറ്റ പൊലിസിലും സ്‌കൂള്‍ ഹെഡ്മാസ്റ്റര്‍ സി.ഡബ്ല്യു.സിക്കും ചൈല്‍ഡ് പ്രൊട്ടക്ഷന്‍ കൗണ്‍സിലിനും പരാതി നല്‍കി.
പൊലിസ് നടത്തിയ അന്വേഷണത്തിലാണ് പ്രദേശവാസികളായ ആറുപേരെ കസ്റ്റഡിയിലെടുത്തത്. സ്‌കൂള്‍ വിട്ട് മടങ്ങി പോകുന്ന വിദ്യാര്‍ഥിനികളെ സമീപത്തെ കട ഉടമസ്ഥനായ പ്രതിയും മറ്റ് പ്രതികളും ചേര്‍ന്ന് മിഠായി, മധുര പലഹാരങ്ങള്‍ എന്നിവ നല്‍കി പിന്‍വശത്തുള്ള താല്‍കാലികമായി നിര്‍മിച്ച ഷെഡിലെത്തിച്ച് മൊബൈലിലെ അശ്ലീല ചിത്രങ്ങള്‍ കാണിച്ചിരുന്നു. ഇവര്‍ കുട്ടികളെ 2016 ഡിസംബര്‍ മുതല്‍ പല തവണ പീഡിപ്പിക്കുകയായിരുന്നുവെന്നും പൊലിസ് പറഞ്ഞു.
സ്‌കൂള്‍ അധികാരികളില്‍ നിന്നു ലഭിച്ച പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത ശേഷം കുട്ടികളെ കൗണ്‍സലിങിനടക്കം വിധേയരാക്കി ശാസ്ത്രീയമായി നടത്തിയ ചോദ്യം ചെയ്യലിലാണ് കേസിന്റെ ചുരുളഴിക്കാന്‍ പൊലിസിന് സാധിച്ചത്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.