ബംഗളൂരു: മധ്യപ്രദേശില്‍ ജ്യോതിരാദിത്യ സിന്ധ്യയ്‌ക്കൊപ്പം കോണ്‍ഗ്രസ് വിട്ടവര്‍ കര്‍ണാടകയിലേക്കാണ് എത്തിയത്. സിന്ധ്യ ബി.ജെ.പിയില്‍ ചേര്‍ന്നെങ്കിലും എം.എല്‍.എമാരെ തിരിച്ചെത്തിക്കാനുള്ള ശ്രമം തുടങ്ങിയിരിക്കുകയാണ് കോണ്‍ഗ്രസ്. അതിന് നേതൃത്വം നല്‍കുന്നത് കര്‍ണാടക കോണ്‍ഗ്രസിലെ ട്രബിള്‍ഷൂട്ടര്‍ ഡി.കെ ശിവകുമാറും.

മധ്യപ്രദേശിലെ വിമത എം.എല്‍.എമാരുമായി സമ്പര്‍ക്കത്തിലാണെന്നും അവരില്‍ ഭൂരിഭാഗം പേരും തിരിച്ചെത്തുമെന്നും ഡി.കെ ശിവകുമാര്‍ പറഞ്ഞു. കര്‍ണാടക കോണ്‍ഗ്രസ് അധ്യക്ഷനായി തെരഞ്ഞെടുക്കപ്പെട്ടതിനു പിന്നാലെയാണ് ഡി.കെ ശിവകുമാര്‍ മധ്യപ്രദേശ് കോണ്‍ഗ്രസ് വിമത എം.എല്‍.എമാരെ തിരിച്ചെത്തിക്കാനുള്ള ശ്രമം ആരംഭിച്ചത്.

എം.എല്‍.എമാരെ സിന്ധ്യ തെറ്റദ്ധരിപ്പിച്ചതാണെന്നും എല്ലാവരും മുഖ്യമന്ത്രി കമാല്‍ നാഥുമായി ബന്ധപ്പെട്ടിട്ടുണ്ടെന്നും മറ്റൊരു കോണ്‍ഗ്രസ് നേതാവ് വെളിപ്പെടുത്തി. എം.എല്‍.എമാര്‍ ബംഗളൂരുവില്‍ ആയതിനാലാണ് ഡി.കെ ശിവകുമാറിനെയും ഇവരെ തിരിച്ചെത്തിക്കാനുള്ള ദൗത്യം ഏല്‍പ്പിച്ചത്.

സിന്ധ്യ അടക്കം 21 പേര്‍ രാജിക്കത്ത് കമാല്‍ നാഥിന് കൈമാറിയെന്നായിരുന്നു റിപ്പോര്‍ട്ടുകള്‍. 19 എം.എല്‍.എമാരാണ് കര്‍ണാടകയില്‍ ഉള്ളതെന്നാണ് ഡി.കെ ശിവകുമാര്‍ പറയുന്നത്. സിന്ധ്യ ബുധനാഴ്ച മൂന്നു മണിയോടെ ബി.ജെ.പിയില്‍ ചേര്‍ന്നെങ്കിലും മറ്റുള്ളവരുടെ അവസ്ഥയെന്താണെന്ന് ഇതുവരെ വ്യക്തമായിട്ടില്ല.