വെള്ളാങ്ങല്ലൂര്‍: അന്താരാഷ്ട്ര മൊയ് തായ് ചാമ്പ്യന്‍ഷിപ്പില്‍ ഇന്ത്യയെ പ്രതിനിധീകരിച്ച് മത്സരിക്കാന്‍ കരൂപ്പടന്ന സ്വദേശി മുഹമ്മദ് ഷുഹൈബിന് ക്ഷണം ലഭിച്ചു. മാര്‍ച്ച് 12 മുതല്‍ 22 വരെ തായ്‌ലാന്‍ഡിലെ ബാങ്കോക്കില്‍ വെച്ചു നടക്കുന്ന രണ്ടാമത് അന്താരാഷ്ട്ര തായ് മാര്‍ഷല്‍ ആര്‍ട്‌സ് ഗെയിംസ് ആന്‍ഡ് ഫെസ്റ്റിവലില്‍ 75 കിലോ മൊയ് തായ് വിഭാഗത്തില്‍ ഷുഹൈബ് മത്സരിക്കും. നാല്‍പ്പതോളം രാജ്യങ്ങളില്‍ നിന്നുള്ള മത്സരാര്‍ഥികള്‍ ഇതില്‍ പങ്കെടുക്കും. കഴിഞ്ഞ നവംബറില്‍ ഗുജറാത്തിലെ സൂറത്തില്‍ വെച്ചു നടന്ന ദേശീയ ചാംപ്യന്‍ഷിപ്പില്‍ 75 കിലോ വിഭാഗത്തില്‍ മൊയ് തായ് ദേശീയ ചാംപ്യനാണ്. ഈ നേട്ടമാണ് അന്താരാഷ്ട്ര മത്സരത്തില്‍ പങ്കെടുക്കാന്‍ അര്‍ഹനാക്കിയത്. 19 വയസ്സുകാരനായ ഷുഹൈബ് നാലുവര്‍ഷമായി കോണത്തുകുന്ന് മസ്‌കുലര്‍ ഫിറ്റ്‌നസ് ആന്‍ഡ് ആര്‍ട്‌സ് ക്ലബ്ബില്‍ പരിശീലിക്കുന്നു. അഷ്‌ക്കര്‍ ബഷീര്‍ ആണ് ട്രെയിനര്‍. കരൂപ്പടന്ന അറക്കല്‍ വീട്ടില്‍ മുഹമ്മദ് നജീബിന്റെയും ഷാഹിദയുടേയും മകനാണ് ഷുഹൈബ്.