പയ്യോളി: തൊഴിലാളികളെ കുത്തിനിറച്ച് തമിഴ്‌നാട്ടിലേക്ക് പോവുകയായിരുന്ന രണ്ട് ലോറികള്‍ പയ്യോളി പൊലിസ് പിടികൂടി.തലശ്ശേരിയില്‍നിന്ന് സേലത്തേക്ക് പുറപ്പെട്ട ലോറികളാണ് പിടികൂടിയത്. രണ്ട് ലോറികളിലായി എഴുപതോളം പേരാണ് ഉണ്ടായിരുന്നത്.

   കൊവിഡ് വ്യാപനത്തിന്റെ  പശ്ചാത്തലത്തില്‍ സര്‍ക്കാര്‍ പുറപ്പെടുവിച്ച നിര്‍ദേശങ്ങള്‍ കാറ്റില്‍ പറത്തിയാണ് തൊഴിലാളികളെ കൊണ്ടുപോകാന്‍ ശ്രമിച്ചത്. ഇന്നലെ വൈകിട്ട് നാല് മണിയോടെയാണ് പയ്യോളി സി.ഐ എം.ആര്‍.ബിജുവിന്റെ നേതൃത്വത്തിലുള്ള സംഘം ഇവരെ പിടികൂടിയത്.  

   തലശ്ശേരി ഭാഗത്ത് പല തൊഴിലുകളില്‍ ഏര്‍പ്പെട്ടിരുന്ന തമിഴ്‌നാട്ടുകാരായ സംഘം ഇപ്പോഴത്തെ സാഹചര്യത്തില്‍ നാട്ടിലേക്കെത്താനായി തിരിച്ചു പോവുകയായിരുന്ന ലോറികളില്‍ കയറിപ്പറ്റി എന്നാണ് വിവരം. 

    ഇത്ര ഗുരുതരമായ സാഹചര്യം നിലനില്‍ക്കുമ്പോള്‍ ഇവരെ ഈ രീതിയില്‍ തമിഴ്‌നാട്ടിലേക്ക് അയക്കാന്‍ കഴിയില്ലെന്ന നിലപാടാണ് അധികൃതര്‍ സ്വീകരിച്ചത്. തൊഴിലാളികള്‍ക്ക് വേണ്ട സൗകര്യങ്ങള്‍ ഒരുക്കി നല്‍കാമെന്ന് കണ്ണൂര്‍ ജില്ലാ കലക്ടര്‍ അറിയിച്ചതിന്റെ  അടിസ്ഥാനത്തില്‍ രണ്ട് കെ.എസ്.ആര്‍.ടി.സി ബസുകളിലായി ഇവരെ തലശേരിയിലേക്ക് തിരിച്ച് കൊണ്ടുപോയി.

   ഇവര്‍ക്ക് വേണ്ട വൈദ്യപരിശോധനയും ഭക്ഷണം ഉള്‍പ്പെടെയുള്ള സൗകര്യങ്ങളും പയ്യോളി നഗരസഭ  ഏര്‍പ്പാട് ചെയ്തിരുന്നു.