ന്യൂഡല്‍ഹി: മധ്യപ്രദേശിലെ ഭോപ്പാലില്‍ മുന്‍മുഖ്യമന്ത്രി കമല്‍നാഥിന്റെ വാര്‍ത്താ സമ്മേളനത്തില്‍ പങ്കെടുത്ത മുതിര്‍ന്ന മാധ്യമപ്രവര്‍ത്തകന് കൊവിഡ്-19 ബാധ സ്ഥിരീകരിച്ചു. ഇയാള്‍ രാജ്ഭവനിലും നിയമസഭയിലും സന്ദര്‍ശനം നടത്തിയിരുന്നു. ലണ്ടനില്‍ നിന്ന് അടുത്തിടെ മടങ്ങിയെത്തിയ മാധ്യമപ്രവര്‍ത്തകന്റെ മകള്‍ക്ക് നേരത്തെ കൊവിഡ് സ്ഥിരീകരിച്ചിരുന്നു. മാര്‍ച്ച് 18നാണ് മകള്‍ നാട്ടിലെത്തിയത്. കൊവിഡ് സ്ഥിരീകരിച്ചതോടെ ഇയാളുമായി ബന്ധപ്പെട്ട മാധ്യമപ്രവര്‍ത്തകരെയും പബ്ലിക് റിലേഷന്‍ ഡിപ്പാര്‍ട്ടുമെന്റ് ഉദ്യോഗസ്ഥരെയും രാഷ്ട്രീയ നേതാക്കളെയും നിരീക്ഷണത്തിലാക്കിയിട്ടുണ്ട്. വാര്‍ത്താസമ്മേളനത്തില്‍ പങ്കെടുത്തവരുടെ ലിസ്റ്റ് തയാറാക്കിയാണ് സര്‍ക്കാര്‍ മാധ്യമപ്രവര്‍ത്തകരെയും മറ്റുള്ളവരെയും നിരീക്ഷണത്തിലാക്കിയത്. മുഖ്യമന്ത്രിസ്ഥാനത്തുനിന്ന് രാജിവച്ചത് പ്രഖ്യാപിക്കാന്‍ മാര്‍ച്ച് 20നാണ് കമല്‍നാഥ് വാര്‍ത്താസമ്മേളനം നടത്തിയത്. 200ലധികം മാധ്യമപ്രവര്‍ത്തകര്‍ പങ്കെടുത്ത വാര്‍ത്താസമ്മേളനത്തില്‍ കോണ്‍ഗ്രസ് നേതാക്കളും എം.എല്‍.എമാരും എത്തിയിരുന്നു. വാര്‍ത്താസമ്മേളനത്തില്‍ വച്ച് പലരും മാധ്യമപ്രവര്‍ത്തകന് കൈകൊടുത്തിട്ടുണ്ട്. ഇതുകൂടാതെ ലണ്ടനില്‍നിന്ന് മകള്‍ മടങ്ങിയെത്തിയ ശേഷം മാധ്യമപ്രവര്‍ത്തകന്‍ ബി.ജെ.പി ഓഫിസും സന്ദര്‍ശിച്ചിരുന്നു.