കൊല്ലം: സംസ്ഥാനത്തെ പൊതുമേഖലാ സ്ഥാപനങ്ങളില്‍ 'സ്വന്തക്കാരെ' തിരുകിക്കയറ്റാനുള്ള താല്‍ക്കാലിക നിയമനങ്ങള്‍ക്കു അണിയറയില്‍ നീക്കം തകൃതി. നിയമസഭാസമ്മേളനത്തിനു ശേഷം താല്‍ക്കാലിക നിയമനങ്ങള്‍ നടത്താനാണു നീക്കം.

കഴിഞ്ഞ സര്‍ക്കാരിന്റെ കാലാവധി തീരുന്നതിന് ആറുമാസം മുന്‍പ് നടത്തിയ നിയമനങ്ങളെക്കുറിച്ചും ഓരോ സ്ഥാപനങ്ങളിലെയും സ്ഥിര, താല്‍ക്കാലിക നിയമനങ്ങളുടെ കണക്കെടുക്കാനും അതതു മന്ത്രിമാരുടെ വകുപ്പുകളില്‍നിന്ന് എം.ഡിമാര്‍ക്കു നിര്‍ദേശം നല്‍കിയിട്ടുണ്ട്. ഇതുസംബന്ധിച്ച സ്ഥിതിവിവരക്കണക്കുകള്‍ ഒരാഴ്ചയ്ക്കുള്ളില്‍ നല്‍കാനാണു നിര്‍ദേശം. വിവിധ വകുപ്പുകളില്‍ നിന്നു വിരമിച്ച ഇടതുപക്ഷ അനുഭാവികള്‍ക്കു താല്‍ക്കാലിക നിയമനം നല്‍കാനാണു നീക്കം.

ഇതനുസരിച്ചു നിയമിക്കപ്പെടേണ്ടവരുടെ പട്ടികയും പാര്‍ട്ടി തീരുമാനപ്രകാരം തയാറായിക്കഴിഞ്ഞതായാണ് അറിയുന്നത്. സര്‍ക്കാര്‍ മാറിയതോടെ മറ്റുജില്ലകളില്‍ ജോലിചെയ്യുന്നവരെ സ്വന്തം ലാവണത്തിലേക്കു ഡെപ്യൂട്ടേഷനില്‍ എത്തിക്കാനുള്ള സംഘടനകളുടെ പ്രവര്‍ത്തനങ്ങളും അണിയറയില്‍ സജീവമാണ്. കഴിഞ്ഞ സര്‍ക്കാരിന്റെ കാലത്തു താല്‍ക്കാലികമായി നിയമനം ലഭിച്ചവര്‍ക്കു ജോലി നഷ്ടമാകുമെന്നുറപ്പായതോടെ പലരും ഇടതുസംഘടനകളില്‍ ചേക്കേറാനുള്ള ശ്രമവും തുടങ്ങി. ഇക്കാര്യത്തില്‍ ആരോപണങ്ങള്‍ ഒഴിവാക്കിയുള്ള നടപടികളാണ് ഇടതുസര്‍വീസ് സംഘടനകള്‍ ഉദ്ദേശിക്കുന്നത്.

അതേസമയം കഴിഞ്ഞ യു.ഡി.എഫ് സര്‍ക്കാരിന്റെ കാലത്തു ആരോഗ്യവകുപ്പിലും മറ്റും നടന്ന ചില താല്‍ക്കാലിക നിയമനങ്ങള്‍ വിവാദമായതിനാല്‍ കരുതലോടെ നീങ്ങാനാണ് സി.പി.എം നിര്‍ദേശം നല്‍കിയിരിക്കുന്നത്.