കോഴിക്കോട്: രാജ്യത്ത് ഫാസിസ്റ്റ് ശക്തികള്‍ വളര്‍ന്ന് വരുന്ന പശ്ചാത്തലത്തില്‍ മതേതര കക്ഷികള്‍ പരസ്പരം വിട്ടുവീഴ്ച ചെയ്ത് ഒന്നിക്കണമെന്ന് കുറ്റിക്കാട്ടൂരില്‍ നടന്ന എസ്. കെ. എസ്. എസ്. എഫ് സംസ്ഥാന കൗണ്‍സില്‍ ക്യാംപ് അംഗീകരിച്ച പ്രമേയം ആവശ്യപ്പെട്ടു.
വിവിധ സംസ്ഥാനങ്ങളില്‍ നടന്ന ഉപതെരഞ്ഞെടുപ്പ് ഫലം മതേതര കക്ഷികളും ന്യൂനപക്ഷങ്ങളും ജാഗ്രതയോടെ വിലയിരുത്തണം. രാജ്യത്തിന്റെ മതേതര പാരമ്പര്യത്തിന് വിള്ളല്‍ വീഴ്ത്തുന്ന സാഹചര്യത്തില്‍ മൃദുഹിന്ദുത്വ സമീപനങ്ങള്‍ വലിച്ചെറിയാന്‍ ബന്ധപ്പെട്ടവര്‍ ആര്‍ജവം കാണിക്കണമെന്നും കൗണ്‍സില്‍ ആവശ്യപ്പെട്ടു. സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ അധ്യക്ഷനായി.
സുന്നി യുവജന സംഘം സംസ്ഥാന സെക്രട്ടറി മുസ്തഫ മുണ്ടുപാറ ഉദ്ഘാടനം ചെയ്തു. നാസര്‍ ഫൈസി കൂടത്തായ് മുഖ്യപ്രഭാഷണം നടത്തി. വാര്‍ഷിക റിപ്പോര്‍ട്ട് അവലോകനവും അടുത്ത ഒരു വര്‍ഷത്തെ പ്രവര്‍ത്തന കലണ്ടര്‍ ചര്‍ച്ചയും യോഗത്തില്‍ നടന്നു. ജനറല്‍ സെക്രട്ടറി സത്താര്‍ പന്തല്ലൂര്‍ ചര്‍ച്ചകള്‍ക്ക് മറുപടി നല്‍കി. റശീദ് ഫൈസി വെള്ളായിക്കോട് സ്വാഗതവും ക്യാംപ് ഡയറക്ടര്‍ ആസിഫ് ദാരിമി പുളിക്കല്‍ നന്ദിയും പറഞ്ഞു.