ജക്കാര്‍ത്ത: ഇന്തോനേഷ്യയില്‍ ഞായറാഴ്ച കുര്‍ബാനയ്ക്കിടെ മൂന്ന് ക്രിസ്ത്യന്‍ പള്ളികള്‍ക്കു നേരെ ഭീകരാക്രമണം. ഇന്തോനേഷ്യയിലെ രണ്ടാമത്തെ വലിയ നഗരമായ സുരബായയിലാണു സംഭവം. സംഭവത്തില്‍ 13 പേര്‍ കൊല്ലപ്പെട്ടു. നിരവധി പേര്‍ക്ക് പരുക്കേല്‍ക്കുകയും ചെയ്തു. ആക്രമണത്തിന്റെ ഉത്തരവാദിത്തം ഐ.എസ് ഏറ്റെടുത്തിട്ടുണ്ട്.
പ്രാദേശിക സമയം ഇന്നലെ രാവിലെ ഏഴരയ്ക്കായിരുന്നു സംഭവം. ആറംഗ കുടുംബമാണ് ആക്രമണം നടത്തിയതെന്ന് പൊലിസ് പറഞ്ഞു. ഒന്‍പതുകാരിയും ആക്രമണത്തില്‍ പങ്കാളിയായതാണു വിവരം. 7.30ന് സാന്റ മരിയ കത്തോലിക്ക ചര്‍ച്ചിലായിരുന്നു ആദ്യ ചാവേറാക്രമണം നടന്നത്. മക്കളായ 16ഉം 18ഉം വയസുള്ള രണ്ടുപേര്‍ ചേര്‍ന്ന് ചര്‍ച്ചിനകത്തേക്ക് സ്‌ഫോടകവസ്തു ഘടിപ്പിച്ച മോട്ടോര്‍ സൈക്കിള്‍ ഇടിച്ചുകയറ്റുകയായിരുന്നു. അഞ്ചു മിനിറ്റിനുള്ളില്‍ തന്നെ സുരബയയിലെ പെന്തക്കോസ്ത് ചര്‍ച്ചിലും ദിപോനെഗോറോ ഇന്തോനേഷ്യന്‍ ക്രിസ്ത്യന്‍ ചര്‍ച്ചിലും ആക്രമണമുണ്ടായി. പെന്തക്കോസ്ത് ചര്‍ച്ചിലേക്ക് ബോംബ് ഘടിപ്പിച്ച കാറുമായി കുടുംബത്തിന്റെ പിതാവാണ് എത്തിയത്. ദിപോനെഗോറോ ഇന്തോനേഷ്യന്‍ ക്രിസ്ത്യന്‍ ചര്‍ച്ചില്‍ മാതാവും ഒന്‍പതും 12ഉം വയസുള്ള ഇവരുടെ പെണ്‍മക്കളും ചേര്‍ന്ന് ആക്രമണം നടത്തി. മറ്റ് ചര്‍ച്ചുകള്‍ക്കു നേരെയുള്ള ആക്രമണശ്രമം പരാജയപ്പെടുത്തിയതായി ഇന്തോനേഷ്യന്‍ വൃത്തങ്ങള്‍ അറിയിച്ചു.
2005നു ശേഷം ഇന്തോനേഷ്യയില്‍ ഐ.എസ് നടത്തിയ ഏറ്റവും വലിയ ആക്രമണമാണിത്. ആമാഖ് വെബ്‌സൈറ്റിലൂടെയാണ് ആക്രമണത്തിന്റെ ഉത്തരവാദിത്തം ഐ.എസ് ഏറ്റെടുത്തത്. അടുത്തിടെ സിറിയയില്‍നിന്നു നാട്ടിലേക്കു മടങ്ങിയ നൂറുകണക്കിന് ഇന്തോനേഷ്യന്‍ കുടുംബങ്ങളില്‍ ഒന്നായിരുന്നു ഇവരെന്ന് പൊലിസ് പറഞ്ഞു. ഐ.എസ് ആഭിമുഖ്യമുള്ള ഇന്തോനേഷ്യന്‍ ഭീകരസംഘമായ ജമാഅത്തു അന്‍സാറുദ്ദൗല(ജെ.എ.ഡി)യെയാണ് പൊലിസ് സംശയിക്കുന്നത്.
ആക്രമണത്തെ ഇന്തോനേഷ്യന്‍ പ്രസിഡന്റ് ജോക്കോ വിദോദോ അപലപിച്ചു. ആക്രമണം കാടത്തമായെന്നും ഭീകരസംഘങ്ങളെ ഉടന്‍ തന്നെ തകര്‍ക്കാന്‍ ഉത്തരവിട്ടതായും അദ്ദേഹം അറിയിച്ചു.