കോഴിക്കോട്: അപൂര്‍വമായ നിപാ വൈറസ് ബാധ വ്യാപകമായി സ്ഥിരീകരിച്ചതോടെ ജനങ്ങള്‍ ആശങ്കയിലാണെന്നും ഇക്കാര്യത്തില്‍ അടിയന്തരമായി സര്‍വകക്ഷിയോഗം വിളിക്കാന്‍ സര്‍ക്കാര്‍ തയ്യാറാവണമെന്നും പ്രതിപക്ഷ ഉപനേതാവ് ഡോ.എം.കെ മുനീര്‍ ആവശ്യപ്പെട്ടു.

കോഴിക്കോട്, മലപ്പുറം ജില്ലകളിലെ എം.എല്‍.എമാരെയും ജനപ്രതിനിധികളെയും പ്രതിരോധ പ്രവര്‍ത്തനത്തിന്റെ നേതൃത്വം ഏല്‍പ്പിക്കണം. പ്രതിരോധ പ്രവര്‍ത്തനങ്ങള്‍ അടിത്തട്ടിലേക്ക് ഫലപ്രദമായി എത്താന്‍ ഉദ്യോഗസ്ഥര്‍ക്കൊപ്പം ജനപ്രതിനിധികളുടെ സാന്നിധ്യവും ഉപകരിക്കും.

രോഗികളെ പരിചരിക്കുമ്പോള്‍ അസുഖം പകര്‍ന്ന് മരണം വരിച്ച നഴ്‌സ് ലിസിയുടെ കുടുംബത്തിന് നഷ്ടപരിഹാരം നല്‍കാനും ഒരാള്‍ക്ക് ജോലി നല്‍കാനും സര്‍ക്കാര്‍ തയ്യാറാവണം. ആവശ്യമായ മുന്‍കരുതല്‍ ഉറപ്പാക്കാനും വിദഗ്ദ ചികിത്സക്കും അമാന്തിക്കരുത്. വിചാരിക്കുന്നത്ര നിസ്സാരമല്ല രോഗത്തിന്റെ രംഗപ്രവേശം. ചില വിദേശ രാജ്യങ്ങളിലും പശ്ചിമ ബംഗാളിലും സ്ഥിരീകരിച്ച നിപാ വൈറസ് ബാധ അവിടെയൊക്കെ എങ്ങനെയാണ് ഉന്മൂലനം ചെയ്തതെന്ന് ഉന്നതതല സംഘം പരിശോധിക്കണം.

രോഗം ഇപ്പോള്‍ പടരാന്‍ ആരോഗ്യ വകുപ്പിന്റെ തുടക്കത്തിലെ വീഴ്ചകളാണെന്നും ഫലപ്രദമായ പരിശോധന നടത്തിയില്ലെന്നുമുളള വിവാദങ്ങളെക്കാള്‍ രോഗം പടരാതിരിക്കാന്‍ കക്ഷി രാഷ്ട്രീയ ഭേദമന്യെ ഒത്തൊരുമിച്ച പ്രവര്‍ത്തനങ്ങളാണ് ഇപ്പോള്‍ ആവശ്യം. രോഗം ബാധിച്ചാല്‍ ചികിത്സിച്ച് സുഖപ്പെടുത്തുന്നതിന് സാധ്യത കുറവാണ്. രോഗം വരാതിരിക്കാനും പടരാതിരിക്കാനും ആരോഗ്യ പ്രവര്‍ത്തകരുടെ നിര്‍ദേശങ്ങള്‍ എല്ലാവരും പാലിക്കണം. പ്രതിരോധ ബോധവല്‍ക്കരണ പ്രവര്‍ത്തനങ്ങളില്‍ നിന്ന് മുഖം തിരിച്ച് പരീക്ഷണത്തിന് ആരും തയാറാവരുതെന്നും എം.കെ മുനീര്‍ അഭ്യര്‍ഥിച്ചു.