മനാമ: ബഹ്‌റൈനില്‍ ലേബര്‍ മാര്‍ക്കറ്റ് റെഗുലേറ്ററി അതോറിറ്റി (LMRA)യുടെ മിന്നല്‍ പരിശോധന. നവംബര്‍ 17 മുതല്‍ 23 വരെയുള്ള കാലയളവില്‍ 1,642 പരിശോധനകള്‍ നടത്തിയതായും ഇതില്‍ 83 നിയമലംഘകരെ കണ്ടെത്തിയതായും അവരെ നാടുകടത്തിയതായും LMRA അറിയിച്ചു. 

നിരവധി ലംഘനങ്ങള്‍ ആണ് പരിശോധനയില്‍ കണ്ടെത്തിയത്. ക്യാപിറ്റല്‍ ഗവര്‍ണറേറ്റില്‍ 20 കാമ്പെയ്‌നുകളും മുഹറഖ് ഗവര്‍ണറേറ്റില്‍ 3 കാമ്പെയ്‌നുകളും നോര്‍ത്തേണ്‍ ഗവര്‍ണറേറ്റിലെ 2 കാമ്പെയ്‌നുകളും ഉള്‍പ്പെടുന്ന 28 സംയുക്ത പരിശോധന കാമ്പെയ്‌നുകള്‍ക്ക് പുറമേ, എല്ലാ ഗവര്‍ണറേറ്റുകളിലെയും വിവിധ കടകളില്‍ 1,614 സന്ദര്‍ശനങ്ങള്‍ നടത്തിയതായും അതോറിറ്റി പത്രക്കുറിപ്പില്‍ അറിയിച്ചു. 

പൗരത്വം, പാസ്‌പോര്‍ട്ട്, റെസിഡന്‍സ് അഫയേഴ്‌സ് (NPRA) എന്നിവ സംബന്ധിച്ചാണ് പ്രധാനമായും ചെക്കിങ് നടന്നത്. ഗവര്‍ണറേറ്റിലെ ബന്ധപ്പെട്ട പോലീസ് ഡയറക്ടറേറ്റ്, ജനറല്‍ ഡയറക്ടറേറ്റ് ഓഫ് ക്രൈം ഡിറ്റക്ഷന്‍ ആന്‍ഡ് ഫോറന്‍സിക് എവിഡന്‍സ്, ജനറല്‍ ഡയറക്ടറേറ്റ് ഓഫ് വെര്‍ഡിക്റ്റ് എന്‍ഫോഴ്‌സ്‌മെന്റ് എന്നിവ ഉള്‍പ്പെടുന്ന ആഭ്യന്തര മന്ത്രാലയ സംഘമാണ് നിരീക്ഷണ, പരിശോധനാ കാംപയിനില്‍ പങ്കെടുത്തത്.

രാജ്യത്തെ എല്ലാ ഗവര്‍ണറേറ്റുകളിലും പരിശോധനാ കാമ്പെയ്‌നുകള്‍ ശക്തമാക്കുന്നതിനും തൊഴില്‍ വിപണിയുടെ സ്ഥിരതയെയും മത്സരക്ഷമതയെയും പ്രതികൂലമായി ബാധിക്കുന്നതോ രാജ്യത്തിന്റെ സാമ്പത്തികവും സാമൂഹികവുമായ സുരക്ഷയെ ദോഷകരമായി ബാധിക്കുന്നതോ ആയ ഏതെങ്കിലും ലംഘനങ്ങളോ പ്രവര്‍ത്തനങ്ങളോ പരിഹരിക്കുന്നതിനും തീരുമാനിച്ചതായി അധികൃതര്‍ പറഞ്ഞു.

ലംഘനങ്ങള്‍ അതോറിറ്റിയുടെ വെബ്‌സൈറ്റായ www.lmra.gov.bh ലെ ഇലക്‌ട്രോണിക് ഫോം വഴിയോ അതോറിറ്റിയുടെ കോള്‍ സെന്ററില്‍ 17506055 എന്ന നമ്പരില്‍ വിളിച്ച് അറിയിക്കണം.

LMRA Conducts 1,642 inspection campaigns and visits in Bahrian