കോതമംഗലം: ജനവാസ കേന്ദ്രത്തില്‍ പുലിയെ കണ്ടതായ വിവരം പുറത്തു വന്നതോടെ ജനം ഭീതിയിലായി. തിരച്ചിലിനൊടുവില്‍ കണ്ടെത്തിയത് കാട്ടുപൂച്ചയെ. കോതമംഗലം രാമല്ലൂര്‍ ഭാഗത്തെ പൈനാപ്പിള്‍ തോട്ടത്തില്‍ ഇന്നലെ രാവിലെ പുലിയെ കണ്ടതായി സമീപത്തുള്ള സത്രീയാണ് വെളിപ്പെടുത്തിയത്. സംഭവം അറിഞ്ഞതോടെ ജനങ്ങള്‍ പരിഭ്രാന്തരാകുകയും പൊലിസിനെയും വനപാലകരെയും വിവരമറിക്കുകയും ചെയ്തു. കോതമംഗലം ഫോറസ്റ്റ് ഫ്‌ളൈയിങ് സ്‌ക്വാഡ് ഡി.എഫ്.ഒ സാബി വര്‍ഗീസ്, കോതമംഗലം സി.ഐ വി.റ്റി ഷാജന്‍, എസ്.ഐ ലൈജുമോന്‍ എന്നിവരുടെ നേതൃത്വത്തില്‍ വനപാലകരും പൊലിസും നാട്ടുകാരും മണിക്കൂറുകളോളം തിരച്ചില്‍ നടത്തി. ഇതിനിടെ  പുലിയുടെതെന്നു സംശയമുള്ള കാല്‍പ്പാദം കണ്ടെത്തി തോടെ പുലി ഇറങ്ങിയെന്ന വിശ്വാസത്തില്‍ തിരച്ചില്‍ തുടര്‍ന്നു. നാട്ടുകാരും വനപാലകരും പൊലിസും രണ്ടു മണിക്കൂറോളം അരിച്ചുപെറുക്കി നടത്തിയ തിരച്ചലിന്റെ  അവസാനമാണ് വലിയ കാട്ടുപൂച്ചയെകണ്ടെത്തിയത്. ഇതോടെ രാവിലെ മുതലുള്ള നാട്ടുകാരുടെ ഭീതിക്കും വിരാമമായി.