ക്വാലാലംപൂര്‍: കാണാതായ മലേഷ്യന്‍ വിമാനം എം.എച്ച് 370ന് വേണ്ടിയുള്ള തിരച്ചില്‍ അടുത്തയാഴ്ച അവസാനിക്കുമെന്ന് മലേഷ്യന്‍ ഗതാഗത വകുപ്പ് മന്ത്രി അന്തോണി ലോക് അറിയിച്ചു. നിലവില്‍ അന്വേഷണം നടത്തുന്ന യു.എസ് സമുദ്ര പര്യവേക്ഷണ സംഘവുമായി കരാര്‍ തുടരണമോയെന്ന കാര്യം പരിശോധിക്കുകയാണെന്ന് പ്രധാനമന്ത്രി മഹാതീര്‍ മുഹമ്മദ് ഇന്നലെ അറിയിച്ചിരുന്നു. ഇതിനു പിന്നാലെയാണ് അന്വേഷണം അവസാനിപ്പിച്ചുവെന്നുള്ള ഗതാഗത മന്ത്രിയുടെ പ്രഖ്യാപനം.
നാല് വര്‍ഷം മുന്‍പ് കാണാതായ വിമാനത്തിന് എന്ത് സംഭവിച്ചുവെന്ന കാര്യം ഇപ്പോഴും അവ്യക്തമാണ്. 239 യാത്രക്കാരുമായി 2014 മാര്‍ച്ചില്‍ പുറപ്പെട്ടമലേഷ്യന്‍ വിമാനം ക്വലാലംപൂരില്‍ നിന്ന് ബെയ്ജിങ്ങിലേക്കുള്ള യാത്രക്കിടെ യാണ് അപ്രത്യക്ഷമായത്. ആസ്‌ത്രേലിയയുടെ നേതൃത്വത്തില്‍ നടത്തിയ തിരച്ചിലില്‍ വിമാനത്തിന്റെ അവശിഷ്ടങ്ങളൊന്നും ലഭിച്ചിട്ടില്ല.
തുടര്‍ന്ന് വിമാനത്തിലുണ്ടായിരുന്നവരുടെ കുടുംബങ്ങളില്‍ നിന്നുണ്ടായ സമ്മര്‍ദത്തെ തുടര്‍ന്ന് തിരച്ചിലിനായി മുന്‍ മലേഷ്യന്‍ സര്‍ക്കാര്‍ യു.എസ് സമുദ്ര പര്യവേക്ഷണ കമ്പനിയെ ചുമതലപ്പെടുത്തി. തിരച്ചിലിനുള്ള തുക വിമാനത്തിന്റെ അവശിഷ്ടങ്ങള്‍ കണ്ടെത്തിയാല്‍ മാത്രമേ നല്‍കുകയുള്ളൂവെന്ന കരാറിലായിരുന്നു അന്വേഷണ ചുമതല സര്‍ക്കാര്‍ കൈമാറിയത്.