മുംബൈ: മഹാരാഷ്ട്രയില്‍ ബി.ജെ.പി ദേശീയ അധ്യക്ഷന്‍ അമിത് ഷായ്‌ക്കെതിരേ ശിവസേനയുടെ പോസ്റ്ററുകള്‍. ഇതോടെ സംസ്ഥാനം ഭരിക്കുന്ന ബി.ജെ.പി-ശിവസേനാ സഖ്യത്തില്‍ അഭിപ്രായഭിന്നത രൂക്ഷമാകുകയാണ്.സംസ്ഥാനത്തെ ബി.ജെ.പിയുടെ മുതിര്‍ന്ന നേതാവും പാര്‍ട്ടി വക്താവുമായ മാധവ് ബന്ധാരി കഴിഞ്ഞ ദിവസം ശിവസേനയ്‌ക്കെതിരേ രംഗത്തെത്തിയിരുന്നു.

ഭരണത്തിലുള്ള പങ്കാളിത്തത്തില്‍നിന്ന് സേനയെ ഒഴിവാക്കണമെന്നു പരോക്ഷമായി ലേഖനത്തില്‍ ആവശ്യപ്പെട്ട അദ്ദേഹം ശിവസേനാ നേതാവ് ഉദ്ദവ് താക്കറെയെ കോമാളിയോട് ഉപമിക്കുകയും ചെയ്തു. തുടര്‍ന്നാണ് അമിത്ഷായ്ക്കും ബന്ധാരിക്കുമെതിരേ പരിഹാസ പോസ്റ്ററുകളുമായി ശിവസേന രംഗത്തെത്തിയത്. സംഭവത്തെ തുടര്‍ന്നു ഇരുപാര്‍ട്ടി നേതാക്കളും പരസ്യമായി പഴിചാരുന്ന പ്രസ്താവനകള്‍ നടത്തുന്നുമുണ്ട്.