കോഴിക്കോട്: നിപാ വൈറസ് ബാധയെ തുടര്‍ന്ന് മരിച്ചവരുടെ മൃതദേഹങ്ങള്‍ സംസ്‌കരിക്കാന്‍ വിസമ്മതിച്ചതിനു മാവൂര്‍ റോഡ് ശ്മശാനം തൊഴിലാളികളായ നെല്ലിക്കോട് ഒടാട്ടുകുളങ്ങര ഓടാട്ട് ബാബു (54), കോട്ടൂളി പള്ളിമലക്കുന്ന് കരിമ്പക്കാട് ഷാജി എന്നിവര്‍ക്കെതിരേ നടക്കാവ് പൊലിസ് കേസെടുത്തു. ചൊവ്വാഴ്ച വൈകിട്ട് മൃതദേഹവുമായി വന്ന കോര്‍പറേഷന്‍ ഹെല്‍ത്ത് ഓഫിസര്‍ ഡോ. ആര്‍.എസ് ഗോപകുമാര്‍, ഇന്‍സ്‌പെക്ടര്‍ ദിലീപ്കുമാര്‍ എന്നിവരുടെ കൃത്യനിര്‍വഹണം തടസപ്പെടുത്തി, മൃതദേഹത്തെ അപമാനിച്ചു എന്നിവയാണ് ഇവര്‍ക്കെതിരേ ചുമത്തിയ കുറ്റം.
കോര്‍പറേഷന്‍ അധികൃതരുടെ പരാതിയിലാണ് ജീവനക്കാര്‍ക്കെതിരേ കേസെടുത്തതെന്ന് നടക്കാവ് പൊലിസ് പറഞ്ഞു. അതേസമയം ശ്മശാനം ജീവനക്കാര്‍ ധിക്കാരപരമായാണു പെരുമാറിയതെന്നും കേസു കൂടാതെ കോര്‍പറേഷന്റെ ഭാഗത്തുനിന്ന് കര്‍ശനനടപടി സ്വീകരിക്കുമെന്നും ആരോഗ്യ സ്റ്റാന്റിങ് കമ്മിറ്റി ചെയര്‍മാന്‍ കെ.വി ബാബുരാജ് പറഞ്ഞു. എന്നാല്‍ സുരക്ഷാ ഉപകരണങ്ങള്‍ ലഭ്യമാക്കാത്തതിനാലാണ് മൃതദേഹങ്ങള്‍ സംസ്‌കരിക്കാന്‍ വിസമ്മതിച്ചതെന്ന് ശ്മശാനം ജീവനക്കാര്‍ പറയുന്നു. മൃതദേഹവുമായി വന്നവര്‍ സുരക്ഷാവസ്ത്രങ്ങള്‍ ധരിച്ചിരുന്നെന്നും അതു കണ്ടതിനാലാണ് ഞങ്ങള്‍ വിസമ്മതിച്ചതെന്നും ഇവര്‍ പറഞ്ഞു.