തിരുവനന്തപുരം: എസ്.എസ്.എല്‍.സി കണക്ക് പരീക്ഷ 30ന് വീണ്ടും നടക്കാനിരിക്കെ വിദ്യാര്‍ഥികള്‍ കടുത്ത സമ്മര്‍ദത്തിലും ആശങ്കയിലുമായി. ഒരേ പരീക്ഷ രണ്ടു തവണ എഴുതേണ്ടിവരുന്ന വേവലാതിയിലാണ് വിദ്യാര്‍ഥികളില്‍ ഭൂരിപക്ഷവും. വിഷയങ്ങളില്‍ ഏറ്റവും കടുപ്പമേറിയതായി ശരാശരി വിദ്യാര്‍ഥികള്‍ വിലയിരുത്തുന്ന കണക്ക് പരീക്ഷക്കായി കണ്ണിലെണ്ണയൊഴിച്ചു പഠിച്ചവരാണ് ആദ്യം പരീക്ഷയെഴുതിയശേഷം പുനഃപരീക്ഷക്കു തയാറാകേണ്ടത്. സോഷ്യല്‍ സയന്‍സോടെ എസ്.എസ്.എല്‍.സി പരീക്ഷ ഇന്ന് അവസാനിക്കേണ്ടതാണ്. പുനഃപരീക്ഷ പ്രഖ്യാപിച്ചതോടെ പലര്‍ക്കും ബാലികേറാമലയായ കണക്ക് വീണ്ടും പഠിക്കേണ്ട ഗതികേടിലാണ്. പരീക്ഷക്കുശേഷം കണക്ക് പുസ്തകവും നോട്ട് ബുക്കും ഉപേക്ഷിച്ചവരും കീറിക്കളഞ്ഞവരും വെട്ടിലായി. പ്രഖ്യാപനം പുറത്തുവന്നതോടെ വിദ്യാര്‍ഥികളില്‍ പലരും കടുത്ത മാനസിക സമ്മര്‍ദത്തിലാണെന്നു രക്ഷിതാക്കള്‍ പറയുന്നു. സിലബസില്‍ നിന്നല്ലാത്ത ചോദ്യങ്ങള്‍ക്കു മാര്‍ക്ക് ലഭിക്കുമെന്നു പ്രതീക്ഷിച്ചിരുന്നവര്‍ നിരാശയിലാണ്. പുനപ്പരീക്ഷയില്‍ മികച്ച നേട്ടം കൈവരിക്കാന്‍ കഴിയുമോയെന്ന സംശയവുമുണ്ട് പലര്‍ക്കും.
കണക്കില്‍ ഉയര്‍ന്ന നിലവാരം പുലര്‍ത്തുന്ന വിദ്യാര്‍ഥികളെ സംബന്ധിച്ചു പുനപ്പരീക്ഷ വലിയ ആശങ്കയുണ്ടാക്കില്ലെങ്കിലും ഒരു പരീക്ഷതന്നെ വീണ്ടും എഴുതേണ്ട അവസ്ഥ ഇവര്‍ക്കും ബുദ്ധിമുട്ടുണ്ടാക്കുന്നുണ്ട്. സ്വകാര്യ സ്ഥാപനം തയാറാക്കിയ മോഡല്‍ പരീക്ഷാ ചോദ്യപേപ്പറിലെ ചോദ്യങ്ങള്‍ എസ്.എസ്.എല്‍.സി പൊതുപരീക്ഷയില്‍ ആവര്‍ത്തിച്ച സാഹചര്യത്തിലാണ് കണക്കു പരീക്ഷ റദ്ദാക്കിയത്. പൊതുപരീക്ഷാ നടത്തിപ്പില്‍ സര്‍ക്കാരും അനുബന്ധ സ്ഥാപനങ്ങളും അനുവര്‍ത്തിക്കുന്ന നിരുത്തരവാദപരമായ കാര്യങ്ങളാണ് വിദ്യാര്‍ഥികളുടെ ഭാവി പന്താടുന്ന ഇത്തരം സംഭവങ്ങളിലേക്ക് നയിക്കുന്നതെന്ന ആരോപണവും ഉണ്ട്.