ദുബൈ: ഈ വർഷത്തെ ഈദുൽ ഫിത്തർ അവധിക്കാലത്ത് ദീർഘദൂര അന്താരാഷ്ട്ര യാത്രകൾക്ക് പകരം അയൽ രാജ്യങ്ങളിലേക്ക് ഹ്രസ്വദൂര യാത്രകൾ തിരഞ്ഞെടുത്ത് യുഎഇ നിവാസികൾ. മാർച്ച് പകുതിയോടെ എത്തുന്ന പെരുന്നാൾ ദിനങ്ങളിൽ യുഎഇയിലും സമീപ ജിസിസി രാജ്യങ്ങളിലും അനുഭവപ്പെടുന്ന സുഖകരമായ കാലാവസ്ഥയാണ് ഈ മാറ്റത്തിന് പ്രധാന കാരണം.

ഒമാൻ, മുസന്ദം തുടങ്ങിയ സ്ഥലങ്ങളിലേക്കുള്ള റോഡ് യാത്രകൾക്കും ഉംറ തീർത്ഥാടനത്തോടൊപ്പം നടത്തുന്ന വിനോദസഞ്ചാരത്തിനുമാണ് നിലവിൽ ആവശ്യക്കാർ ഏറെയെന്ന് ട്രാവൽ ഏജന്റുമാർ വ്യക്തമാക്കുന്നു.

എന്തുകൊണ്ട് ജിസിസി യാത്രകൾ?

കുടുംബങ്ങൾ അന്താരാഷ്ട്ര യാത്രകൾക്ക് പകരം പ്രാദേശിക യാത്രകൾ തിരഞ്ഞെടുക്കുന്നതിന് പിന്നിൽ പ്രധാനമായും മൂന്ന് കാരണങ്ങളാണുള്ളത്.

• സുഖകരമായ കാലാവസ്ഥ: മാർച്ചിലെ ശൈത്യകാലാവസ്ഥ പുറംകാഴ്ചകൾ ആസ്വദിക്കാൻ അനുയോജ്യമാണ്. കുട്ടികളുമായി മാളുകളിൽ പോകുന്നതിന് പകരം ബീച്ചുകളിലും വാദികളിലും സമയം ചെലവഴിക്കാനാണ് പലരും ആഗ്രഹിക്കുന്നത്.
• ഉംറയും വിനോദവും: റമദാനിലെ അവസാന പത്തു ദിവസങ്ങളിൽ ഉംറ നിർവ്വഹിക്കുകയും, തുടർന്ന് ഈദ് അവധി മദീന, അബഹ, അൽഉല തുടങ്ങിയ സഊദിയിലെ പ്രമുഖ സ്ഥലങ്ങൾ സന്ദർശിക്കാനായി മാറ്റിവെക്കുകയും ചെയ്യുന്നവരുടെ എണ്ണം വർദ്ധിക്കുകയാണ്.
• ബജറ്റ് പ്ലാനിംഗ്: വേനൽക്കാല അവധിക്ക് യൂറോപ്പിലേക്കോ റഷ്യയിലേക്കോ പോകാൻ പ്ലാൻ ചെയ്യുന്നവർ, ഈദ് അവധിയിൽ ജിസിസി യാത്രകൾ നടത്തി വാർഷിക അവധിയും പണവും ലാഭിക്കാനാണ് ശ്രമിക്കുന്നത്.

ALSO READ: ചെറിയ പെരുന്നാളിന് നാട്ടിൽ വരുന്നുണ്ടോ? വിമാനയാത്രാ നിരക്ക് വർധനവ് കീശ കാലിയാക്കും; പ്രവാസികൾ പെരുന്നാൾ അവധി ചെലവഴിക്കുന്നത് ഇങ്ങനെ

പ്രിയപ്പെട്ട ഇടങ്ങൾ ഒമാനും മുസന്ദവും

ഒമാനിലെ മസ്കത്ത്, മുത്ര കോർണിഷ്, നിസ്വ കോട്ട, വാദി ഷാബ് എന്നിവയാണ് റോഡ് യാത്രക്കാരുടെ പ്രധാന ലക്ഷ്യസ്ഥാനങ്ങൾ. സുഹൃത്തുക്കളും ബന്ധുക്കളുമായി വലിയ ഗ്രൂപ്പുകളായി ചേർന്ന് വില്ലകൾ ബുക്ക് ചെയ്ത് ബാർബിക്യൂവും കയാക്കിംഗും ഉൾപ്പെടെയുള്ള ഔട്ട്‌ഡോർ പ്രവർത്തനങ്ങളിൽ ഏർപ്പെടാനാണ് പലരും താൽപ്പര്യപ്പെടുന്നത്.

തിരക്കേറിയ നഗരക്കാഴ്ചകളേക്കാൾ പ്രകൃതിയോട് ചേർന്നുള്ള സമാധാനപരമായ അന്തരീക്ഷമാണ് കുടുംബങ്ങൾ ഇപ്പോൾ ഇഷ്ടപ്പെടുന്നതെന്ന് വൈസ്‌ഫോക്‌സ് ടൂറിസത്തിലെ സീനിയർ മാനേജർ സുബൈർ തെക്കേപുരത്ത്വളപ്പിൽ പറഞ്ഞു. ഗ്രൂപ്പ് യാത്രകൾ വഴി കുട്ടികൾക്കും മുതിർന്നവർക്കും ഒരുപോലെ സാമൂഹികമായ ഒത്തുചേരലിന് അവസരം ലഭിക്കുന്നുണ്ടെന്നും അദ്ദേഹം കൂട്ടിച്ചേർത്തു.

A new travel report suggests that families in the United Arab Emirates are increasingly opting for regional and asian destinations instead of traditional european getaways this eid season. Rising travel costs, visa processing times, and convenience are influencing choices. Popular picks include short-haul leisure hubs and visa-friendly countries, offering family-friendly packages and quick connectivity from major uae airports.