മൂന്നാര്‍: ഒടുവില്‍ മൂന്നാറില്‍ അനധികൃത കൈയേറ്റങ്ങള്‍ക്കെതിരേ സര്‍ക്കാര്‍ നടപടി ആരംഭിച്ചു. ചിത്തിരപുരത്ത് റിസോര്‍ട്ടുകള്‍ കൈയേറിയ സര്‍ക്കാര്‍ ഭൂമി തിരിച്ചു പിടിക്കാനുള്ള നടപടികളാണ് ഇന്ന് ആരംഭിച്ചത്. ഇവിടെ റിസോര്‍ട്ടുകള്‍ കൈയേറി നിര്‍മിച്ച മതിലുകള്‍ പൊളിച്ചു നീക്കി. ഇവിടെ 15.50 സെന്റ് ഭൂമിയാണ് അനധികൃതമായി റിസോര്‍ട്ടുടമ കൈയേറിയിരുന്നത്.

ചിത്തിരപുരം, പള്ളിവാസല്‍ എന്നിവിടങ്ങളിലാണ് നിരോധനം മറികടന്ന് നിരവധി കെട്ടിടങ്ങള്‍ പണിതത്.
ഇവിടെ സര്‍ക്കാര്‍ ഭൂമി കൈയേറി സ്വകാര്യ സ്ഥാപനങ്ങള്‍ നിരവധി റിസോര്‍ട്ടുകളാണ് പണിതത്. ഇവിടെ റവന്യൂ അധികൃതരുടെയും വില്ലേജ് ഓഫിസ് ഉദ്യോഗസ്ഥരുടെയും ഒത്താശയോടെയാണ് നിര്‍മാണങ്ങള്‍ നടക്കുന്നതെന്ന് വ്യാപകമായി വിമര്‍ശനമുയര്‍ന്നിരുന്നു. ഈ സന്ദര്‍ഭത്തിലാണ് അനധികൃതമായി കൈയേറി നിര്‍മിച്ച കെട്ടിടങ്ങള്‍ ഒഴിപ്പിക്കാന്‍ നടപടി ആരംഭിച്ചത്.