സ്വന്തം ലേഖകന്‍
തിരുവനന്തപുരം: കൊവിഡ് പ്രതിരോധ നടപടികളുടെ ഭാഗമായി ഇനി നിയന്ത്രണം മറികടന്ന് പുറത്തിറങ്ങുന്നവരെ പിടികൂടാന്‍ ഇനി ആകാശത്ത് കഴുകന്‍കണ്ണുകളുമായി യന്ത്രങ്ങള്‍ പാറിപറക്കും.
സംസ്ഥാനത്ത് മുഴുവനായി ഡ്രോണ്‍ ഉപയോഗിച്ച് നടത്തുന്ന നിരീക്ഷണത്തിന് പൊലിസ് നല്‍കിയിരിക്കുന്ന പേരാണ് ഈഗിള്‍ ഐ. സംസ്ഥാന പൊലിസ് മേധാവിയെ വിശേഷിപ്പിച്ചുകൊണ്ടാണ് ഈഗിള്‍ എന്ന പദം ഉപയോഗിച്ചിരിക്കുന്നത്.
നിയന്ത്രണങ്ങള്‍ മറികടന്നു പുറത്തിറങ്ങുന്നവരെ കണ്ടുപിടിക്കാന്‍ കേരള പൊലിസ് സൈബര്‍ഡോമിന്റെ നേതൃത്വത്തില്‍ കേരളത്തിലെ എല്ലാ ജില്ലകളിലും വിവിധ ഡ്രോണ്‍ അസോസിയേഷനുമായി ചേര്‍ന്ന് നിരീക്ഷണം ശക്തമാക്കി.
ഏകദേശം 300 ഡ്രോണുകള്‍ ഉപയോഗിച്ചാണ് ജില്ലകള്‍ തോറും നിരീക്ഷണം നടത്തുന്നത് . കേരളത്തില്‍ ആദ്യമായാണ് എല്ലാ ജില്ലകളിലും ഇത്തരത്തിലൊരു നിരീക്ഷണം ഓരേ സമയം ഏര്‍പ്പെടുത്തുന്നത്. ഇതിന്റെ സംസ്ഥാനതല ഏകോപനവും അവലോകനവും പൊലിസ് ആസ്ഥാനത്ത് പൊലിസ് മേധാവി ലോക്‌നാഥ് ബെഹ്‌റയും എ.ഡി.ജി.പി മനോജ് എബ്രഹാമും ചേര്‍ന്ന് നിര്‍വഹിച്ചു.
പരീക്ഷണപ്പറക്കലും നിരീക്ഷണവും നടത്തിയ ശേഷമാണ് പദ്ധതി പൂര്‍ണതോതില്‍ നടപ്പിലാക്കുന്നത്. ഇതുവഴി റോഡില്‍ വിന്യസിക്കുന്ന പൊലിസുകാരുടെ എണ്ണവും ജോലിഭാരവും കുറയ്ക്കാന്‍ കഴിയുമെന്നതാണ് പ്രത്യേകത.കൂടാതെ കൊവിഡ് 19 ഭീഷണിയില്‍ നിന്ന് പ്രതിരോധ പ്രവര്‍ത്തനരംഗത്ത് നില്‍ക്കുന്ന പൊലിസുകാര്‍ക്ക് കൂടുതല്‍ സുരക്ഷാകവചം ഒരുക്കുകയും ചെയ്യും.
ഇന്നലെ സംസ്ഥാനത്ത് പകര്‍ച്ചവ്യാധി നിയമപ്രകാരം ഉള്‍പ്പടെ നിരോധനം ലംഘിച്ചതിന് 1949 പേരെ അറസ്റ്റ് ചെയ്തു. 1991 കേസുകള്‍ രജിസ്റ്റര്‍ ചെയ്യുകയും 1477 വാഹനങ്ങള്‍ പിടിച്ചെടുക്കുകയും ചെയ്തു.