ഭോപ്പാല്‍:മധ്യപ്രദേശില്‍ തെരഞ്ഞെടുപ്പ് പ്രചാരണ പരിപാടികള്‍ക്ക് രാഹുല്‍ഗാന്ധി തുടക്കമിട്ടു. മധ്യപ്രദേശിലെ മന്ദ്‌സൗറില്‍ കര്‍ഷകര്‍ക്ക് നേരെയുണ്ടായ പൊലിസ് വെടിവയ്പിന്റെ ഒന്നാം വാര്‍ഷിക ദിനത്തോടനുബന്ധിച്ചുള്ള പരിപാടിയില്‍ പങ്കെടുത്താണ് രാഹുല്‍ തെരഞ്ഞെടുപ്പ് പ്രചാരണത്തിന് തുടക്കമിട്ടത്. കേന്ദ്ര സര്‍ക്കാരിനും പ്രധാനമന്ത്രി മോദിക്കുമെതിരേ രാഹുല്‍ ആഞ്ഞടിച്ചു.
മേയ്ക്ക് ഇന്‍ ഇന്ത്യ പദ്ധതി പരാജയമാണെന്നും രാജ്യത്ത് നടക്കുന്നത് മെയ്ഡ് ഇന്‍ ചൈനയാണെന്നും അദ്ദേഹം പരിഹസിച്ചു. ചൈനീസ് ഉല്‍പ്പന്നങ്ങള്‍ നിറഞ്ഞ് ഇന്ത്യന്‍ വിപണിയില്‍ നിന്ന് തദ്ദേശീയ ഉല്‍പ്പന്നങ്ങള്‍ പുറത്തായിരിക്കുകയാണ്. ഇന്ത്യയല്ല ഇപ്പോള്‍ ചൈനയാണ് എല്ലാം നിര്‍മിക്കുന്നത്. നമ്മുടെ പ്രധാനമന്ത്രി ചൈനീസ് നേതാവിനൊപ്പം ഉലാത്തുകയാണ്. ഡോക്‌ലാമില്‍ ചൈനീസ് സൈന്യം അതിക്രമിച്ചു കയറിയപ്പോള്‍ പോലും അതിനെതിരേ ഒരക്ഷരം പറയാന്‍ മോദി തയാറായില്ല.വാഗ്ദാനം ചെയ്ത 15 ലക്ഷം രൂപയെക്കുറിച്ച് മറന്നേക്കൂ, അഞ്ച് രൂപയെങ്കിലും കൊടുക്കാന്‍ അവര്‍ക്ക് കഴിഞ്ഞോ എന്നും അദ്ദേഹം ചോദിച്ചു. മധ്യപ്രദേശില്‍ കോണ്‍ഗ്രസ് അധികാരത്തിലെത്തിയാല്‍ 10 ദിവസത്തിനകം കാര്‍ഷിക കടങ്ങളെല്ലാം എഴുതിത്തള്ളും. കര്‍ഷകര്‍ ആത്മഹത്യ ചെയ്യുമ്പോഴും വന്‍ വ്യവസായികളെ പിന്തുണയ്ക്കുന്ന നയമാണ് പ്രധാനമന്ത്രിയുടേതെന്നും രാഹുല്‍ ആരോപിച്ചു.