കൊച്ചി: കേരള ഹൈക്കോടതിയിലെ ജഡ്ജിമാരുടെ ഒഴിവിലേക്ക് കൊളീജിയം ശുപാര്‍ശ ചെയ്ത പേരുകള്‍ ചോദ്യം ചെയ്യുന്ന ഹരജി തള്ളിയതിനെതിരേ അപ്പീല്‍ സമര്‍പ്പിച്ചു.
മതിയായ യോഗ്യതയില്ലാത്തവരെയാണ് കൊളീജിയം ശുപാര്‍ശ ചെയ്തതെന്ന് ഹരജിയില്‍ പറയുന്നില്ലെന്നും പലരും ജഡ്ജിമാരുടെ ബന്ധുക്കളായത് അയോഗ്യതയല്ലെന്നും ചൂണ്ടിക്കാട്ടിയാണ് സിംഗിള്‍ ബെഞ്ച് ഹരജി തള്ളിയത്.
കൊളീജിയം നല്‍കിയ ശുപാര്‍ശയില്‍ കോടതിയുടെ വിലയിരുത്തല്‍ സാധ്യമല്ലെന്നും സിംഗിള്‍ ബെഞ്ച് വ്യക്തമാക്കിയിരുന്നു. എന്നാല്‍ യോഗ്യരായ നിരവധി പേരെ ഒഴിവാക്കിയാണ് ബന്ധുക്കളായ ചിലരുടെ പേര് ശുപാര്‍ശ ചെയ്തതെന്നാണ് ഹരജിക്കാര്‍ വാദിക്കുന്നത്. കൂടാതെ കൊളീജിയം ശുപാര്‍ശയില്‍ കോടതിയുടെ വിലയിരുത്തല്‍ സാധ്യമാണെന്നും അപ്പീലില്‍ പറയുന്നു.
സിംഗിള്‍ ബെഞ്ച് ഉത്തരവ് നിയമപരമായി നിലനില്‍ക്കുന്നതല്ലെന്നും അപ്പീല്‍ അനുവദിക്കണമെന്നുമാണ് ഹരജിക്കാരുടെ ആവശ്യം. തൃശൂര്‍ സ്വദേശി സി.ജെ ജോവ്‌സണ്‍, കളമശേരി സ്വദേശി സാബു എന്നിവരാണ് ഡിവിഷന്‍ ബെഞ്ചില്‍ അപ്പീല്‍ നല്‍കിയിരിക്കുന്നത്.