വെസ്റ്റ് ബാങ്ക്: ഇസ്‌റാഈല്‍ സൈന്യം നടത്തിയ വെടിവയ്പില്‍ ഫലസ്തീന്‍ യുവാവ് കൊല്ലപ്പെട്ടു. അധിനിവിഷ്ട വെസ്റ്റ് ബാങ്കിലെ നബി സ്വലാഹ് പ്രദേശത്തെ ഇസ്സദ്ദീന്‍ തമീമി (21)നെയാണ് സൈന്യം വെടിവച്ചുകൊന്നത്. അറസ്റ്റ് ചെയ്യാന്‍ വന്നപ്പോള്‍ സൈന്യത്തെ കല്ലെറിഞ്ഞുവെന്ന് ആരോപിച്ചാണ് ഇദ്ദേഹത്തെ കൊലപ്പെടുത്തിയത്.
45 മീറ്റര്‍ അകലത്തില്‍വച്ചാണ് ഇസ്സദ്ദീന്‍ തമീമിയെ കൊലപ്പെടുത്തിയതെന്നും കഴുത്തില്‍ മൂന്ന് തവണ വെടിയേറ്റുവെന്നും ഫലസ്തീന് അധികൃതര്‍ പറഞ്ഞു.
വെടിയേറ്റ ഉടനെ ഇസ്സുദ്ദീന്‍ തമീമിക്ക് ചികിത്സ നല്‍കാനുള്ള ശ്രമം ഇസ്‌റാഈല്‍ സൈന്യം തടഞ്ഞുവെന്ന് ഗ്രാമീണര്‍ പറഞ്ഞു. അറസ്റ്റ് ചെയ്യാനായി എത്തിയപ്പോള്‍ പാറക്കല്ല് കൊണ്ടു എറിഞ്ഞതിനാലാണ് വെടിവച്ചതെന്നാണ് സൈന്യത്തിന്റെ വാദം. അധിനിവിഷ്ട വെസ്റ്റ് ബാങ്കില്‍ ഫലസ്തീനികളെ ഇസ്‌റാഈല്‍ സൈന്യം വെടിവച്ചുകൊല്ലുന്നതിനെതിരേ വ്യാപകമായ പ്രതിഷേധം ഉയര്‍ന്നിട്ടുണ്ട്.
നിര്‍മാണ തൊഴിലാളിയായ ഫലസ്തീന്‍കാരെ ശനിയാഴ്ച സൈന്യം വെടിവച്ചുകൊന്നിരുന്നു. വാഹനം നിര്‍ത്താന്‍ ആവശ്യപ്പെട്ടത് അനുസരിക്കാത്തതിനാലാണ് വെടിവച്ചതെന്നാണ് സൈന്യം പറഞ്ഞത്.
ഇസ്‌റാഈല്‍ അധിനിവേഷത്തിനെതിരേ മാര്‍ച്ച് 30 മുതല്‍ തുടരുന്ന പ്രതിഷേധത്തിനിടെ ഇതുവരെ 119 ഫലസ്തീനികള്‍ കൊല്ലപ്പെട്ടു.
വെള്ളിയാഴ്ച റാസാന്‍ അല്‍ നജ്ജാര്‍ എന്ന നഴ്‌സിനെ ഗസ്സയില്‍ പരുക്കേറ്റവരെ ഒഴിപ്പിക്കുന്നതിനിടെ സൈന്യം വെടിവച്ച്‌കൊന്നിരുന്നു.