തൊടുപുഴ: സ്‌കൂള്‍-കോളജ് പരിസരങ്ങളില്‍ കഞ്ചാവ് വില്‍പന നടത്തിയിരുന്ന യുവാവിനെ എക്‌സൈസ് സംഘം അറസ്റ്റ് ചെയ്തു. അഞ്ചിരി പാലപ്പിള്ളില്‍ കോളാപ്പിള്ളില്‍ അഖില്‍ (22) ആണ് പിടിയിലായത്. ഇയാളുടെ പക്കല്‍നിന്ന് 14 പൊതികളിലായി 105 ഗ്രാം കഞ്ചാവും 10,720 രൂപയും വില്‍പനയ്ക്കായി ഉപയോഗിച്ചിരുന്ന ബൈക്കും കസ്റ്റഡിയില്‍ എടുത്തു. ഒരു പൊതിക്ക് അഞ്ഞൂറു രൂപയാണ് വില.
ഇന്നലെ രാവിലെ 11 ഓടെ ഇയാള്‍ കല്ലാനിക്കല്‍ സ്‌കുള്‍ ജങ്ഷനില്‍ ഉണ്ടെന്ന് രഹസ്യ വിവരം ലഭിച്ചതിനെത്തുടര്‍ന്ന് എക്‌സൈസ് ഷാഡോസംഘം എത്തുകയായിരുന്നു. ഇവരെ കണ്ടതോടെ അടുത്തുള്ള കനാലില്‍ചാടി രക്ഷപെടാന്‍ ശ്രമിച്ചെങ്കിലും നാട്ടുകാരുടെ സഹായത്തേടെ പിടികൂടി. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.