ദുബൈ: രാജ്യാന്തര ബോട്ട് ഷോക്ക് ജുമൈറയില്‍ തുടക്കമായി. ഷോയില്‍ നാന്നൂറിലധികം ബോട്ടുകളും അന്‍പതു രാജ്യങ്ങളില്‍നിന്നുള്ള 800 രാജ്യാന്തര ബ്രാന്‍ഡുകളും പങ്കെടുക്കുന്നുണ്ട്. അഞ്ചുദിവസം നീളുന്ന ദുബൈ രാജ്യാന്തര ബോട്ട് ഷോയില്‍ മത്സ്യബന്ധന ബോട്ടുകള്‍, ഉല്ലാസ നൗകകള്‍, സൂപ്പര്‍ യോട്ടുകള്‍ തുടങ്ങിയവ പ്രദര്‍ശനത്തിനുണ്ട്.
ചെറുതും വലുതുമായ 38 ബോട്ടുകള്‍ ദുബൈ കനാലില്‍ നീറ്റിലിറക്കുന്ന ചടങ്ങ് നടക്കും. ചലിക്കുന്ന കൊട്ടാരങ്ങള്‍ എന്നു വിശേഷിപ്പിക്കുന്ന 17 വന്‍ ബോട്ടുകള്‍, 50 മീറ്റര്‍ നീളമുള്ള കീസന്‍ റോക്കറ്റ്, 47 മീറ്ററുള്ള അക്വാ മറീന്‍ തുടങ്ങിയവയാണ് ഇത്തവണത്തെ പ്രത്യേകതകള്‍.
പൊതുജനങ്ങള്‍ക്കു വൈകിട്ടു മൂന്നുമുതല്‍ രാത്രി ഒന്‍പതുവരെയാണു പ്രവേശനം. 65 ദിര്‍ഹമാണ് ടിക്കറ്റ് നിരക്ക്.