കണ്ണൂര്‍: ചക്കരക്കല്‍ പൊലിസ് സ്റ്റേഷനു നേരേ ബോംബേറ്. വ്യാഴാഴ്ച പുലര്‍ച്ചെ 4.15ഓടെയായിരുന്നു സംഭവം. രണ്ടു ബൈക്കുകളിലായെത്തിയ സംഘം രണ്ടു നാടന്‍ ബോംബുകള്‍ എറിയുകയായിരുന്നു. ബോംബുകള്‍ പൊലിസ് സ്റ്റേഷനു മുന്നിലെ റോഡില്‍ വച്ചാണ് പൊട്ടിയത്. സ്റ്റേഷനു നാശമൊന്നും സംഭവിച്ചിട്ടില്ല.

ബുധനാഴ്ച രാത്രി കാപ്പാട് ചേലോറ റോഡില്‍ വച്ച് നിധീഷ് എന്നയാളെ നാലംഗ സംഘം തടഞ്ഞുനിര്‍ത്തി മര്‍ദിച്ചിരുന്നു. ഈ സംഭവത്തിലെ പ്രതികളെ പിടികൂടാന്‍ രാത്രി തന്നെ കാപ്പാട്, ചേലോറ മേഖലയില്‍ പൊലിസ് റെയ്ഡ് നടത്തിയിരുന്നു. റെയ്ഡില്‍ മറ്റു കേസുകളിലെ രണ്ടു പ്രതികളെ പൊലിസ് പിടികൂടിയിരുന്നു. ഇതാണോ ബോംബേറിനു കാരണമെന്നു പൊലിസ് സംശയിക്കുന്നു. വിവരമറിഞ്ഞ് കണ്ണൂര്‍ ഡി.വൈ.എസ്.പി കെ.കെ മൊയ്തീന്‍കുട്ടി സ്ഥലത്തെത്തിയിട്ടുണ്ട്.