ആലുവ: ഫ്‌ലിപ്കാര്‍ട്ട് ഓണ്‍ലൈന്‍ ഷോപ്പിന്റെ സൈറ്റില്‍ നല്‍കിയിരിക്കുന്നത് പോസ്റ്റ് ഓഫിസ് ഫോണ്‍ നമ്പര്‍. ഫോണ്‍ വിളി മൂലം പൊറുതി മുട്ടി തപാല്‍ അധികൃതര്‍. തോട്ടു മുഖത്ത് പ്രവര്‍ത്തിക്കുന്ന ഫ്‌ലിപ്കാര്‍ട്ട് ഓണ്‍ലൈന്‍ ഷോപ്പിന്റെ വെബ്‌സൈറ്റിലാണ് തോട്ടു മുഖം പോസ്റ്റ് ഓഫിസ് നമ്പര്‍ നല്‍കിയിരിക്കുന്നത്. ഫ്‌ലിപ്കാര്‍ട്ടിന്റെ മേല്‍വിലാസത്തിന് ഒപ്പമാണ് തോട്ടു മുഖം പോസ്റ്റ് ഓഫിസിന്റെ ഫോണ്‍ നമ്പര്‍ നല്‍കിയിരിക്കുന്നത്. ഫ്‌ലിപ്കാര്‍ട്ടിന്റെ ഫോണ്‍ നമ്പര്‍ നല്‍കിയിട്ടുമില്ല. ഇതുമൂലം ആളുകള്‍ വിളിക്കുന്നത് തോട്ടു മുഖം പോസ്റ്റ് ഓഫിസിലേക്കാണ്.
ഫ്‌ലിപ്കാര്‍ട്ട് ആണോ എന്ന് പറഞ്ഞുള്ള വിളിക്ക് ഉത്തരം പറഞ്ഞ് പൊറുതി മുട്ടിരിക്കുകയാണ് പോസ്റ്റ് ഓഫിസ് ജീവനക്കാര്‍. ഇതുമൂലം പോസ്റ്റ് ഓഫിസ് ജോലികള്‍ക്ക് തടസം നേരിടുകയാണ്. നിരവധി വിളികളാണ് ദിനേന വരുന്നത്. രണ്ട് ബ്രാഞ്ച് പോസ്റ്റ് ഓഫിസ് ഉള്‍പ്പടെയുളള തോട്ടു മുഖം പോസ്റ്റ് ഓഫിസില്‍ ഒരു ജീവനക്കാരി മാത്രമാണുള്ളത്. ഫോണ്‍ കോളുകള്‍ക്ക് മറുപടി പറഞ്ഞ് തന്നെ ധാരാളം സമയം പാഴാകുന്നു. ഇതുമായി ബന്ധപ്പെട്ട് ഫ്‌ലിപ്പ്കാര്‍ട്ടുമായി ബന്ധപ്പെട്ടപ്പോള്‍ പോസ്റ്റ് ഓഫിസിന്റെ പേരിനോടനുബന്ധിച്ചാണ് പോസ്റ്റ് ഓഫിസ് ഫോണ്‍ നമ്പര്‍ നല്‍കിയിരിക്കുന്നതെന്നാണ് അവര്‍ പറയുന്നത്. മേല്‍ വിലാസത്തോടൊപ്പം ഫ്‌ലിപ്കാര്‍ട്ടിന്റെ ഫോണ്‍ നമ്പര്‍ നല്‍കാത്തതാണ് പോസ്റ്റ് ഓഫിസിന് വിനയാകുന്നത്.