തിരുവനന്തപുരം: കൊവിഡിനെതിരേയുള്ള പോരാട്ടത്തിലെ മുന്നണിപ്പോരാളികളായ ആരോഗ്യ പ്രവര്‍ത്തകര്‍ക്ക് സൗജന്യ യാത്രയൊരുക്കി ഓണ്‍ലൈന്‍ ടാക്‌സിയായ ഊബര്‍. കൊവിഡ് ഇല്ലാത്ത മറ്റ് രോഗികള്‍ക്കും സൗജന്യമായി ഊബറില്‍ യാത്ര ചെയ്യാം. സംസ്ഥാന ആരോഗ്യ വകുപ്പുമായി സഹകരിച്ച് ഊബര്‍ മെഡിക് സര്‍വിസിന്റെ ഭാഗമാണ് ഈ സൗജന്യ സേവനം.
ആഗോളതലത്തിലുള്ള ഊബറിന്റെ ഒരുകോടി സൗജന്യ റൈഡ് പരിപാടിയുടെ ഭാഗമാണിത്. ഊബര്‍ മെഡിക് 16 നഗരങ്ങളിലെ 30 ആശുപത്രികളിലെ ആരോഗ്യ പ്രവര്‍ത്തകര്‍ക്ക് സൗജന്യ യാത്ര ഒരുക്കും. ഒരുകോടി സൗജന്യ യാത്രകളും ഭക്ഷണ വിതരണ പരിപാടിയുമാണ് ആഗോളതലത്തില്‍ ഊബര്‍ ആവിഷ്‌കരിച്ചിരിക്കുന്നത്. കൊവിഡ് വൈറസ് പടരുന്നത് തടയാനുള്ള പോരാട്ടത്തില്‍ കേരള സര്‍ക്കാര്‍ മുന്നിട്ടു നില്‍ക്കുകയാണെന്ന് ഊബര്‍ ദക്ഷിണേഷ്യ ഓപ്പറേഷന്‍സ് ഡയരക്ടര്‍ പ്രഭ്ജീത് സിങ് പറഞ്ഞു.