പയ്യന്നൂര്‍: കൊറ്റിയിലെ അബ്ദുല്‍ഹക്കീം വധക്കേസില്‍ സി.ബി.ഐ സംഘം കസ്റ്റഡിയില്‍ വാങ്ങിയ പ്രതികളെ ചോദ്യംചെയ്യല്‍ തുടരുന്നു. കഴിഞ്ഞദിവസം വൈകുന്നേരം അന്വേഷണ സംഘത്തിനു ജുഡീഷ്യല്‍ കസ്റ്റഡിയില്‍ ലഭിച്ച എ.പി മുഹമ്മദ് റഫീഖിനെ ചോദ്യംചെയ്തതിന്റെ അടിസ്ഥാനത്തില്‍ നിര്‍ണായക വിവരങ്ങള്‍ ലഭിച്ചതായാണു സൂചന. കൊലപാതകത്തിനു നേതൃത്വം നല്‍കിയവരെയും മൃതദേഹം കത്തിച്ചവരെയും തിരിച്ചറിഞ്ഞെന്നാണ് അന്വേഷണസംഘത്തിന്റെ വിശദീകരണം. ഇതിന്റെ അടിസ്ഥാനത്തില്‍ രണ്ടുപേരെ സി.ബി.ഐ കസ്റ്റഡിയിലെടുത്തതായി സൂചനയുണ്ട്.
എന്നാല്‍ കേസന്വേഷണത്തിന്റെ വിവരങ്ങള്‍ മാധ്യമങ്ങള്‍ക്കു നല്‍കാന്‍ അന്വേഷണസംഘം തയാറാകുന്നില്ല. കസ്റ്റഡിയില്‍ ലഭിച്ച പ്രതികളെ തെളിവെടുപ്പിനായി പയ്യന്നൂരിലെത്തിക്കാന്‍ സി.ബി.ഐ നീക്കം തുടങ്ങി. അറസ്റ്റിലായ പ്രതികളെ രഹസ്യമായി പയ്യന്നൂരിലെത്തിച്ച് തെളിവെടുപ്പ് നടത്താനാണു സി.ബി.ഐ ശ്രമം.