മാഡ്രിഡ്: മലാഗയെ വീഴ്ത്തി സ്പാനിഷ് ലാ ലിഗ പോയിന്റ് പട്ടികയില്‍ ഒന്നാം സ്ഥാനത്തെത്താമെന്ന ബാഴ്‌സലോണയുടെ മോഹത്തിനു അപ്രതീക്ഷിത തിരിച്ചടി. കഴിഞ്ഞ ദിവസം അരങ്ങേറിയ മാഡ്രിഡ് ഡെര്‍ബിയില്‍ റയല്‍ മാഡ്രിഡിനെ അത്‌ലറ്റിക്കോ മാഡ്രിഡ് 1-1നു സമനിലയില്‍ പിടിച്ചതോടെ മലാഗക്കെതിരായ വിജയം ബാഴ്‌സയ്ക്ക് ഒന്നാം സ്ഥാനത്തെത്താനുള്ള അവസരം നല്‍കുന്നതായിരുന്നു. എന്നാല്‍ സംഭവിച്ചത് തിരിച്ചായിരുന്നു. സ്വന്തം തട്ടകത്തില്‍ കളിക്കാനെത്തിയ മുന്‍ ചാംപ്യന്‍മാരെ മറുപടിയില്ലാത്ത രണ്ടു ഗോളുകള്‍ക്കു അട്ടിമറിച്ചാണു മലാഗ കരുത്തു കാട്ടിയത്. മത്സരത്തിന്റെ 65ാം മിനുട്ടില്‍ സൂപ്പര്‍ താരം നെയ്മര്‍ ചുവപ്പു കാര്‍ഡ് കണ്ടു പുറത്തായതും കറ്റാലന്‍ പടയ്ക്കു തിരിച്ചടിയായി മാറി. ആദ്യ പകുതിയുടെ 32ാം മിനുട്ടിലും കളിയുടെ അവസാന നിമിഷത്തിലുമാണു ബാഴ്‌സ രണ്ടു ഗോള്‍ വഴങ്ങിയത്.
പട്ടികയില്‍ ഒന്നാം സ്ഥാനത്തുള്ള റയല്‍ മാഡ്രിഡിനു 72 പോയിന്റുകള്‍. രണ്ടാമതുള്ള ബാഴ്‌സലോണയ്ക്കു 69ഉം പോയിന്റുകള്‍. മലാഗയെ വീഴ്ത്തിയിരുന്നെങ്കില്‍ ബാഴ്‌സ റയലിനൊപ്പം 72 പോയിന്റ് പങ്കിടുമായിരുന്നു. റയലിനേക്കാള്‍ ഗോള്‍ ശരാശരി കൂടുതലുള്ളതിനാല്‍ ഒന്നാം സ്ഥാനത്തേക്കു ബാഴ്‌സയ്ക്കായിരുന്നു അവസരം. തോല്‍വി അവരുടെ പ്രതീക്ഷകള്‍ക്കു കനത്ത തിരിച്ചടിയാണ്.
മറ്റൊരു മത്സരത്തില്‍ വലന്‍സിയ ഗ്രനാഡയെ കീഴടക്കി. ഒന്നിനെതിരേ മൂന്നു ഗോളുകള്‍ക്കാണു വലന്‍സിയയുടെ വിജയം.