മലപ്പുറം: വള്ളിക്കാപ്പറ്റ അന്ധവിദ്യാലയത്തില്‍ ഇനി അധ്യാപന പാര്‍ക്കും. മങ്കട വള്ളിക്കാപ്പറ്റ അന്ധവിദ്യാലയത്തിലാണ് വേറിട്ട പഠനവഴികളിലൂടെ ശ്രദ്ധേയമാകുന്ന പഠന പദ്ധതി തുടങ്ങുന്നത്. കാഴ്ച പരിമിതരും അംഗപരിമിതരുമായ വിദ്യാര്‍ഥികള്‍ക്കായി സ്പര്‍ശനത്തോടുകൂടിയ സംസ്ഥാനത്തെ ആദ്യത്തെ അധ്യാപന പാര്‍ക്ക് സ്‌കൂളില്‍ തയാറായിട്ടുണ്ട്. ഇത് ഇന്നു വിദ്യാര്‍ഥികള്‍ക്കു സമര്‍പ്പിക്കും.
നാലര ലക്ഷം രൂപയാണ് പാര്‍ക്കിന്റെ ചെലവ്. ചുറ്റുമുള്ളതെല്ലാം തൊട്ടറിഞ്ഞ് പഠിപ്പിക്കുകയും തുറന്ന അന്തരീക്ഷത്തില്‍ കുട്ടികളെ കളിക്കാനും ഉല്ലസിക്കാനും വിട്ട് പഠനവിഷയങ്ങളെ മനസിലുറപ്പിക്കുകയുമാണ് പാര്‍ക്കിലൂടെ ലക്ഷ്യം. ജ്യാമിതീയ രൂപങ്ങള്‍, അബാക്കസ്, അടിസ്ഥാന ശാസ്ത്രം, ഭൂഗോളം, ലോക മാപ്പ്, സൗരയൂഥം, ഇന്ത്യാ മാപ്പ്, കേരളാ മാപ്പ് എന്നിങ്ങനെ വിവിധ അറിവുകള്‍ പാര്‍ക്കില്‍ ഒരുക്കിയിട്ടുണ്ട്.
ദീര്‍ഘചതുരം, സമചതുരം, ത്രികോണം, വൃത്തം, പഞ്ചഭുജം മാതൃകകള്‍ പാര്‍ക്കിന്റെ ചുമരിലുണ്ട്. സ്റ്റീലില്‍ നിര്‍മിച്ച വലിയ ഗ്ലോബില്‍ നേരിയ കമ്പികള്‍കൊണ്ടാണ് രാജ്യങ്ങളെ വേര്‍ത്തിരിച്ചിരിക്കുന്നത്. പുഴയും കുന്നും മലയുമെല്ലാം അനുഭവേദ്യമാക്കാന്‍ പ്രത്യേക തെറാപ്പി സെന്ററുമുണ്ട്. മണ്ണ്, മണല്‍, പുഴയിലെ കല്ല്, പുല്ല്, ടൈല്‍, കോണ്‍ക്രീറ്റ് എന്നിവ ഇതിനായി നിലത്തൊരുക്കിയിട്ടുണ്ട്. ഇതിലൂടെ നടന്നു വ്യത്യസ്ത അനുഭവങ്ങളറിയാം. പാര്‍ക്കിലെ മരങ്ങള്‍ക്കു തറയൊരുക്കിയതും ജ്യാമിതീയ രൂപങ്ങള്‍ അനുസരിച്ചാണ്. ഭിന്നശേഷിക്കാര്‍ക്കു ചികിത്സാപരമായ വ്യായാമങ്ങള്‍ക്കും സൗകര്യമുണ്ട്.
അഞ്ചു വര്‍ഷംകൊണ്ട് നിര്‍മാണം പൂര്‍ത്തീകരിക്കാന്‍ ലക്ഷ്യമിട്ടിരുന്ന പാര്‍ക്ക് മഞ്ചേരി റോട്ടറി ക്ലബിന്റെ സഹായത്തോടെയാണ് മൂന്നു മാസത്തിനുള്ളില്‍ അണിയിച്ചൊരുക്കിയത്. ഇതുവഴി ക്ലാസ് മുറികളിലെ പഠനവും എളുപ്പത്തിലാകുമെന്ന് പ്രധാനാധ്യാപകന്‍ യാസിര്‍ പറഞ്ഞു. ഇന്നു വൈകിട്ട് നാലിനു റോട്ടറി ഡിസ്ട്രിക്ട് ഗവര്‍ണര്‍ ശിവശങ്കരന്‍ ഉദ്ഘാടനം ചെയ്യും. മഞ്ചേരി റോട്ടറി ക്ലബ് പ്രസിഡന്റ് ഡോ. സുജിത്ത്, സെക്രട്ടറി ഡോ. സന്ദീപ്, ഡോ. ലാലപ്പന്‍, കെ.വി ജോഷി, അഡ്വ. ജോസി ജേക്കബ് പങ്കെടുക്കും.