പുത്തനത്താണി: ആഢംബര കാറുകള്‍, ബൈക്കുകള്‍ എന്നിവ മോഷ്ടിക്കുന്ന യുവാക്കളായ രണ്ടു പേരെ പൊലിസ് പിടികൂടി. ആതവനാട് വെട്ടിക്കാട്ട് പരിക്കുഴിയില്‍ സനൂപ് (28), കരിപ്പോള്‍ കല്ലുവെട്ടുകുഴിയില്‍ ഇഖ്ബാല്‍ (25) എന്നിവരെയാണു കല്‍പകഞ്ചേരി സബ് ഇന്‍സ്‌പെക്ടര്‍ പി.എം ഷെമീറും സംഘവും വാഹന പരിശോധനക്കിടെ പിടികൂടിയത്. രണ്ടു പേരും മോഷണം നടത്തിയ ബൈക്കില്‍ സഞ്ചരിക്കുന്നിനിടയില്‍ പൊലിസിന്റെ വാഹന പരിശോധനയില്‍പ്പെടുകയായിരുന്നു. ബൈക്കിലെത്തി മാലമോഷ്ടിക്കല്‍, വീടുകള്‍ കുത്തിത്തുറന്നു മോഷണം തുടങ്ങിയ കേസുകളടക്കം പിടിയിലായവര്‍ക്കു പെരിന്തല്‍മണ്ണ, കുളത്തൂര്‍, വളാഞ്ചേരി, കാടാമ്പുഴ, കല്‍പ്പകഞ്ചേരി, തിരൂര്‍, കോഴിക്കോട് റെയില്‍വെ സ്റ്റേഷന്‍ ഉള്‍പ്പെടെയുള്ള സ്റ്റേഷനുകളില്‍ കേസുകള്‍ നിലവിലുണ്ടെന്നു പൊലിസ് പറഞ്ഞു. ഇവരെ തിരൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു.