കുറ്റിക്കാട്ടൂര്‍: വളര്‍ന്നുവരുന്ന വിദ്യാര്‍ഥി സമൂഹം അവരുടെ നൈസര്‍ഗിക കഴിവുകള്‍ രാജ്യത്തിനും സമൂഹത്തിനും ഉപകരിക്കുന്ന വിധം പരിപോഷിപ്പിക്കണമെന്ന് സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പ്രസ്താവിച്ചു. ഓരോരുത്തരിലും വ്യത്യസ്ത കഴിവുകള്‍ ഉണ്ടാകും. മതത്തിന്റേയും മാനവരാശിയുടെയും വളര്‍ച്ചയും പുരോഗതിയും ലക്ഷ്യമാക്കി അവ വളര്‍ത്തിക്കൊണ്ടു വരുന്നതിനുള്ള മത്സരം പ്രോത്സാഹിക്കപ്പെടേണ്ടതാണെന്ന് അദ്ദേഹം കൂട്ടിച്ചേര്‍ത്തു. കുറ്റിക്കാട്ടൂര്‍ ജാമിഅ യമാനിയ്യയില്‍ നടക്കുന്ന സമസ്ത കേരള ജംഇയ്യത്തുല്‍ മുഅല്ലിമീന്‍ 14ാമത് ജില്ലാതല ഇസ്‌ലാമിക കലാമേള ഉദ്ഘാടനം ചെയ്തു സംസാരിക്കുകയായിരുന്നു തങ്ങള്‍.