പൊന്നാനി: വികേന്ദ്രിത മാലിന്യ സംസ്‌കരണത്തിന്റെ ഭാഗമായി പൊന്നാനി നഗരസഭയില്‍ പൈപ്പ് കമ്പോസ്റ്റുകള്‍ വിതരണം ചെയ്തു. പൊന്നാനി നഗരസഭ നടത്തുന്ന മാലിന്യ നിര്‍മാര്‍ജന പ്രവര്‍ത്തനങ്ങളുടെ തുടര്‍ച്ചയായാണ് പൈപ്പ് കംപോസ്റ്റ് വിതരണം ചെയ്യുന്നത്. മാലിന്യം ഉറവിടത്തില്‍ തന്നെ സംസ്‌കരിച്ച് ജൈവ മാലിന്യ പ്രശ്‌നത്തിന് പരിഹാരം കണ്ടെത്തലാണ് നഗരസഭ ഇതിലൂടെ ലക്ഷ്യം വയ്ക്കുന്നത്.
പൊന്നാനി നരസഭ 201617 ജനകീയാസൂത്രണ പദ്ധതി പ്രകാരമാണ് പൈപ്പ് കമ്പോസ്റ്റ് വിതരണം ചെയ്യുന്നത്. ആദ്യ ഘട്ടത്തില്‍ അപേക്ഷ നല്‍കിയ 540 കുടുംബങ്ങള്‍ക്കാണ് രണ്ടുസെറ്റ് പൈപ്പ് കംപോസ്റ്റ് വീതം വിതരണം ചെയ്യുന്നത്. നാലര ലക്ഷം രൂപയാണ് നഗരസഭ ഇതിനായി മാറ്റി വച്ച പദ്ധതി വിഹിതം.
നഗരസഭയില്‍ നടന്ന വിതരണോദ്ഘാടനം നഗരസഭ ചെയര്‍മാന്‍ സി.പി മുഹമ്മദ് കുഞ്ഞി നിര്‍വഹിച്ചു. നഗരസഭ വൈസ് ചെയര്‍പേഴ്‌സണ്‍ വി രമാദേവി അധ്യക്ഷയായി. കൗണ്‍സിലര്‍മാരായ കെ ഗണേശന്‍, പി രാമകൃഷ്ണന്‍, നാസര്‍ പതിയോടത്ത്, ഒ.വി ഹസീന, ജയപ്രകാശ്, നഗരസഭ സെക്രട്ടറി കെ.കെ മനോജ്, വി.ടി പ്രിയ സംസാരിച്ചു.