കല്‍പ്പറ്റ: നഴ്‌സിങ് ജോലിക്കായി കുവൈത്തിലെത്തിയ യുവതിയെ ഏജന്റ് പൂട്ടിയിട്ടതായി പരാതി. പുല്‍പ്പള്ളി സ്വദേശിനിയായ സോഫിയ പൗലോസിനെയാണ് കുവൈത്തില്‍ പൂട്ടിയിട്ടത്. നഴ്‌സിങ് ജോലിക്കായി കൊണ്ടുപോയ യുവതിക്ക് മറ്റൊരു ജോലിയാണ് കൊടുത്തത്. ഇത് എതിര്‍ത്തതോടെയാണ് പൂട്ടിയിട്ടത്്. ഇതുസംബന്ധിച്ച് സോഫിയയുടെ കുടുംബം പുല്‍പ്പള്ളി പൊലിസില്‍ പരാതി നല്‍കി. പെരിന്തല്‍മണ്ണയിലെ ട്രാവല്‍ ഏജന്‍സി വഴി കഴിഞ്ഞ മെയ് 15നാണ് സോഫിയ ദുബൈയില്‍ എത്തിയത്. അവിടെയുള്ള ഏജന്റിന്റെ അടുത്തേക്കാണ് ട്രാവല്‍ ഏജന്‍സി അയച്ചത്. നഴ്‌സിങ് ജോലി വാഗ്ദാനം ചെയ്ത യുവതിക്ക് അവിടെയെത്തിയപ്പോള്‍ ഹോം നഴ്‌സിന്റെ ജോലിയാണ് നല്‍കിയത്. അത് വേണ്ടെന്ന് പറഞപ്പോള്‍ കുവൈത്തില്‍ നഴ്‌സിങ് ജോലി ശരിയാക്കാമെന്ന് പറഞ്ഞ് അവിടേക്ക് കൊണ്ടു പോവുകയായിരുന്നു. 48,000 രൂപ ശമ്പളം വാഗ്ദാനം ചെയ്താണ് കൊണ്ടുപോയത്. അവിടെയും ജോലി ശരിയായില്ല. തുടര്‍ന്ന് വീട്ടില്‍ പോകണമെന്ന് ആവശ്യപ്പെട്ടെങ്കിലും ഇവരെ കുവൈത്തില്‍ മുറിയില്‍ പൂട്ടിയിടുകയായിരുന്നു. സമീപത്തെ മലയാളി സ്ത്രീയുടെ ഫോണില്‍നിന്ന് സോഫിയ തിങ്കളാഴ്ച വൈകിട്ട് വീട്ടുകാര്‍ക്ക് ശബ്ദ സന്ദേശം അയച്ചതോടെയാണ് പൂട്ടിയിട്ട വിവരം അറിയുന്നത്. രണ്ട് ലക്ഷം രൂപ കൊടുത്താലേ പുറത്തു വിടൂ എന്നാണ് പറയുന്നതെന്നും സോഫിയ അയച്ച ശബ്ദ സന്ദേശത്തില്‍ പറയുന്നു. സഹോദരീ ഭര്‍ത്താവ് ബാബുവിനാണ് സന്ദേശം ലഭിച്ചത്.