റിയാദ്: മക്കയില്‍ 24 മണിക്കൂര്‍ കര്‍ഫ്യു ഇളവ് പ്രഖ്യാപിച്ചു. സഊദി ആഭ്യന്തര മന്ത്രാലയമാണ് കര്‍ഫ്യു ഇളവും മക്ക നഗരപരിധി വിട്ടുകടക്കാനുമുള്ള അനുമതിയും നല്‍കിയത്. കര്‍ഫ്യൂ സമയത്തില്‍ ഇളവും പള്ളികളില്‍ നിസ്‌കാര അനുമതിയും നല്‍കുന്ന ഇളവുകള്‍ രണ്ടു ഘട്ടമായാണ് പ്രാബല്യത്തില്‍ വരുത്തുകയെന്ന് സഊദി ആഭ്യന്തര മന്ത്രാലയം അറിയിച്ചു. ആദ്യ ഘട്ടത്തില്‍ അടുത്ത ഞായറാഴ്ച്ച രാവിലെ ആറു മണി മുതല്‍ വൈകീട്ട് മൂന്ന് മണി വരെയാണ് കര്‍ഫ്യു ഇളവ് പ്രഖ്യാപിച്ചത്. നഗരത്തിലേക്ക് പോകാനും വരാനും അനുമതി നല്‍കും. അതേസമയം, മസ്ജിദുല്‍ ഹറാമില്‍ നിസ്‌കാരവും ജമാഅത്തും നിലവിലെ രീതി തുടരുമെന്നും അധികൃതര്‍ അറിയിച്ചു.
രണ്ടാം ഘട്ടത്തില്‍ ജൂണ്‍ 21 മുതല്‍ കര്‍ഫ്യു ഇളവ് രാവിലെ ആറു മുതല്‍ രാത്രി എട്ടു മണിവരെയാക്കി ഉയര്‍ത്തും. കൂടാതെ, മറ്റു ജുമുഅ അടക്കം നിര്‍ബന്ധ നിസ്‌കാരങ്ങളും ആരോഗ്യ മന്ത്രാലയ നിര്‍ദേശങ്ങള്‍ പാലിച്ച് അനുവദിക്കും. നിലവില്‍ പള്ളികളില്‍ നിസ്‌കാരത്തിനായി എത്തുന്നതിനുള്ള നിര്‍ദേശങ്ങള്‍ ഇസ്‌ലാമിക കാര്യ മന്ത്രാലയം പുറത്തു വിട്ടിട്ടുണ്ട്. എന്നാല്‍ അമ്പതിലധികം ആളുകള്‍ കൂടുന്ന പരിപാടികള്‍ക്കും ബാര്‍ബര്‍ ഷോപ്പുകള്‍, വിനോദ കേന്ദ്രങ്ങള്‍, ഹെല്‍ത്ത് ക്ലബ്ബുകള്‍ എന്നിവക്കും വിലക്കുണ്ടാകും. റെസ്‌റ്റോറന്റുകളും ബൂഫിയകളും അടക്കമുള്ള വ്യാപാരസ്ഥാപനങ്ങള്‍ക്ക് തുറന്നു പ്രവര്‍ത്തിക്കാമെന്നും സഊദി ആഭ്യന്തര മന്ത്രാലയം അറിയിച്ചു.
അതേസമയം, സഊദിയില്‍ കൊവിഡ് നിയന്ത്രണങ്ങള്‍ പൂര്‍ണമായും ഒഴിവാക്കുന്നതിന്റെ ഭാഗമായുള്ള കര്‍ഫ്യു ഇളവിന്റെ ഒന്നാം ഘട്ടം ആരംഭിച്ചു. വ്യാഴം രാവിലെ ആറു മുതല്‍ മക്കയൊഴികെയുള്ള രാജ്യത്തെ മുഴുവന്‍ ഭാഗങ്ങളിലും ഒന്നാം ഘട്ട ഇളവ് ആരംഭിച്ചിട്ടുണ്ട്.