ന്യൂഡല്‍ഹി: ജമ്മു കശ്മിരില്‍ കൊവിഡ് ബാധിച്ച് മരിച്ചയാളുടെ സംസ്‌കാരം തടഞ്ഞത് വിവാദമാകുന്നു. ദൊമാനയിലാണ് 72കാരന്റെ മൃതദേഹം സംസ്‌കരിക്കുന്നത് ഒരുകൂട്ടമാളുകള്‍ തടഞ്ഞത്. ഇവര്‍ അക്രമത്തിനു മുതിര്‍ന്നതോടെ പാതി ദഹിപ്പിച്ച മൃതദേഹവുമായി കുടുംബത്തിന് രക്ഷപ്പെടേണ്ടിവന്നു. തുടര്‍ന്ന് മറ്റൊരിടത്താണ് മൃതദേഹം സംസ്‌കരിച്ചത്.ഇന്നലെയായിരുന്നു സംഭവം. കൊവിഡ് രോഗിയുടെ മൃതദേഹം സംസ്‌കരിക്കുന്നതിനെതിരേ പ്രദേശത്തുകാര്‍ രംഗത്തെത്തുകയായിരുന്നുവെന്നാണ് വിവരം. ആരോഗ്യവകുപ്പിലെ ഉദ്യോഗസ്ഥരടക്കമുള്ളവരെയാണ് നാട്ടുകാര്‍ അക്രമിച്ചത്. കല്ലേറുണ്ടായതോടെ ഉദ്യോഗസ്ഥരടങ്ങുന്ന സംഘം ആംബുലന്‍സില്‍ തിരികെപ്പോകുകയായിരുന്നു. കൊവിഡ് ജാഗ്രതാ നിര്‍ദേശം പാലിച്ച് വളരെക്കുറച്ചു പേര്‍ മാത്രമായിരുന്നു ചടങ്ങില്‍ പങ്കെടുത്തിരുന്നത്.

എന്നാല്‍, മൃതദേഹം സ്വന്തം നാട്ടില്‍ സംസ്‌കരിക്കാന്‍ അധികൃതര്‍ സമ്മതിച്ചില്ലെന്നും അവര്‍ നിര്‍ദേശിച്ച സ്ഥലത്ത് സംസ്‌കരിക്കുമ്പോഴാണ് പ്രശ്‌നമുണ്ടായതെന്നും ആരോപിച്ച് ബന്ധുക്കള്‍ രംഗത്തെത്തിയിട്ടുണ്ട്. പ്രദേശത്തുണ്ടായിരുന്ന പൊലിസുകാര്‍ സംഘര്‍ഷസമയത്തു സഹായിച്ചില്ലെന്നും കുടുംബം ആരോപിക്കുന്നുണ്ട്.