കൊച്ചി: എറണാകുളം മഹാരാജാസ് കോളജിലുണ്ടായ സംഘട്ടനത്തില്‍ എസ്എഫ്‌ഐ പ്രവര്‍ത്തകന്‍ കുത്തേറ്റു മരിച്ചു. കോളജിലെ രണ്ടാം വര്‍ഷ വിദ്യാര്‍ഥി ഇടുക്കി വട്ടവട സ്വദേശി അഭിമന്യു ആണ് മരിച്ചത്. കോട്ടയം സ്വദേശി അര്‍ജുന്‍ ഗുരുതര പരുക്കുകളോടെ ചികിത്സയിലാണ്.

പോസ്റ്റര്‍ ഒട്ടിക്കുന്നതിനെ ചൊല്ലി കോളജില്‍ എസ്എഫ്‌ഐ -ക്യാംപസ് ഫ്രണ്ട് പ്രവര്‍ത്തകര്‍ തമ്മില്‍ തര്‍ക്കം ഉണ്ടായിരുന്നതായി പൊലിസ് പറഞ്ഞു. രാത്രി 12 മണിയോടെയാണ് അഭിമന്യുവിനു കുത്തേറ്റത്. ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. എസ്.എഫ്.ഐ ഇടുക്കി ജില്ലാ കമ്മിറ്റിയംഗമാണ് അഭിമന്യു. 

സംഭവത്തില്‍ മൂന്ന് ക്യാംപസ് ഫ്രണ്ട് പ്രവര്‍ത്തകരെ പൊലിസ് കസ്റ്റഡിയില്‍ എടുത്തിട്ടുണ്ട്. ബിലാല്‍, ഫാറൂഖ്, റിയാസ് എന്നിവരെയാണ് കസ്റ്റഡിയിലെടുത്തത്.

സംഭവത്തില്‍ പ്രതിഷേധിച്ച് എസ്.എഫ്.ഐ ഇന്ന് സംസ്ഥാന വ്യാപകമായി പഠിപ്പുമുടക്കും.