തൃക്കരിപ്പൂര്‍: കേരളത്തിലെ കലാമികവ് വിളിച്ചറിയിച്ച് ശിങ്കാരിമേളത്തില്‍ കൊട്ടിക്കയറി ഇടയിലെക്കാട്ടിലെയും കാലിച്ചാംപൊതിയിലെയും പെണ്‍പട. കേന്ദ്ര സാംസ്‌കാരിക മന്ത്രാലയത്തിന്റെ കീഴിലുള്ള അഖില ഭാരത ലോക കലാ മഹോത്സവത്തിലാണ് കേരളത്തെ പ്രതിനിധീകരിച്ച വനിതാ സംഘം കൈയടി നേടിയത്.
അഖില ഭാരതീയ ഫോക് ആദിവാസി കലാപരിഷത്തിന്റെ നേതൃത്വത്തില്‍ ജമ്മു-കാശ്മീര്‍, ഹരിയാന, പഞ്ചാബ്, ഹിമാചല്‍ പ്രദേശ്, ഉത്തര്‍ഖണ്ഡ്, ഉത്തര്‍പ്രദേശ്, ദില്ലി സംസ്ഥാനങ്ങളിലാണ് ശിങ്കാരിമേളം അവതരിപ്പിച്ച് വനിതാ സംഘം പ്രശംസ പിടിച്ചുപറ്റിയത്. ഈ മാസം 15ന് ആരംഭിച്ച കലാപര്യടനം 29ന് സമാപിക്കും. ഇവര്‍ക്കൊപ്പം രാജ്യത്തെ മറ്റ് ഒന്‍പത് സംസ്ഥാനങ്ങളിലെ വിവിധ കലാരൂപങ്ങള്‍ അവതരിപ്പിക്കുന്ന സംഘങ്ങളുമുണ്ട്.
ആയിരക്കണക്കിനാളുകള്‍ ഒത്തുചേരുന്ന വന്‍ പങ്കാളിത്തത്തോടെയുള്ള അവതരണങ്ങളാണ് ഓരോ കേന്ദ്രങ്ങളിലും നടക്കുന്നതെന്ന് ശിങ്കാരിമേള പരിശീലകന്‍ പ്രേമരാജന്‍ കണ്ണങ്കൈയും ട്രൂപ്പ് ലീഡര്‍ ആശാ ഗോവിന്ദ് ഏഴിലോടും പറഞ്ഞു.  ഇടയിലെക്കാട് നവോദയ ഗ്രന്ഥാലയം വനിതാ വാദ്യസംഘത്തിലെ പി.വി ശ്യാമള, കെ. അജിത, കെ.വി നളിനി, പി.വി സുമിത്ര, കെ. കാര്‍ത്യായനി, കെ.പിണ്ടണ്ടണ്ട പത്മിനി, കാലിച്ചാം പൊതി ചിലങ്ക വനിതാ വാദ്യസംഘത്തിലെ പി. ചന്ദ്രിക, എന്‍.കെ പ്രസന്ന, പി.വി ജയന്തി, കെ. പുഷ്പ, ടി. ലക്ഷ്മി എന്നിവരാണ് ശിങ്കാരിമേള സംഘത്തിലുള്ളത്.
തൃക്കരിപ്പൂര്‍ ഫോക്ലാന്‍ഡിന്റെ നേതൃത്വത്തിലാണ് ഇവര്‍ പരിശീലനം നേടിയത്.
ഹരിയാനയിലെ കുരുക്ഷേത്ര, ഗുലുചിക്ക, പഞ്ചാബിലെ പാട്യാല പഞ്ചാബി യൂനിവേഴ്‌സിറ്റി, ഗുര്‍ദാസ്പൂര്‍, ഹിമാചല്‍ പ്രദേശിലെ ദല്‍ഹൗസി, ധര്‍മശാല, ഉത്തര്‍ഖണ്ഡിലെ ഡെറാഡൂണ്‍, ഋഷികേശ്, ഹരിദ്വാര്‍ എന്നിവിടങ്ങളില്‍ പരിപാടി അവതരിപ്പിച്ച് നാളെ ഉത്തര്‍പ്രദേശിലെ വരാണസിയിലെ സുരഗംഗ ഉത്സവത്തോടെയാകും സമാപനം.