തൃശൂര്‍: ലോക്‌സഭാ തെരഞ്ഞെടുപ്പ് പരിസ്ഥിതി സൗഹൃദമാക്കുന്നതിനായി ബോധവല്‍ക്കരണ പ്രവര്‍ത്തനങ്ങള്‍ നടത്താനും തെരഞ്ഞെടുപ്പ് പ്രക്രിയയുമായി ബന്ധപ്പെട്ട് ഉണ്ടാവുന്ന മാലിന്യങ്ങളുടെ സംസ്‌കരണത്തിനും നടപടിയായി.  തെരഞ്ഞെടുത്ത പോളിങ് ലൊക്കേഷനുകളില്‍ പരിസ്ഥിതി സൗഹൃദ ആശയങ്ങള്‍ ഉള്‍ക്കൊള്ളുന്ന പോസ്റ്ററുകള്‍, ബാനറുകള്‍, മറ്റ് അലങ്കാരങ്ങള്‍ എന്നിവ സ്ഥാപിക്കാന്‍ ജില്ലാ കലക്ടര്‍ ടി.വി അനുപമ നിര്‍ദേശിച്ചു.
തെരഞ്ഞെടുപ്പ് സാധന സാമഗ്രികളുടെ വിതരണവും ശേഖരണവും നടക്കുന്നതും വോട്ടണ്ണല്‍ നടക്കുന്നതുമായ കേന്ദ്രങ്ങളില്‍ ഉണ്ടാവുന്ന മാലിന്യങ്ങള്‍ തരംതിരിച്ച് ശേഖരിച്ച് സംസ്‌കരിക്കാനും നിര്‍ദേശിച്ചു. ജില്ലയിലെ തെരഞ്ഞെടുപ്പ് സാമഗ്രികളുടെ വിതരണം, സ്വീകരണം, വോട്ടെണ്ണല്‍ കേന്ദ്രങ്ങളില്‍ കളര്‍ കോഡോടെയുള്ള ചവറ്റുകുട്ടകള്‍ അതത് തദ്ദേശ സ്വയംഭരണ സ്ഥാപനം തയാറാക്കാനും നിര്‍ദേശം നല്‍കി.
തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ ഏപ്രില്‍ 22, 24 തിയതികളില്‍ പ്രചാരണ സാമഗ്രികള്‍ നീക്കി ശുചീകരണ പ്രവര്‍ത്തനങ്ങള്‍ നടത്താനും നിര്‍ദേശിച്ചു.
പോളിങ് ഉദ്യോഗസ്ഥരും ട്രെയിനിങ്, കമ്മിഷനിങ് മുതലായ അവസരങ്ങളിലും പൂര്‍ണമായി ഹരിതചട്ടം പാലിക്കുന്നതായി അസി. റിട്ടേണിങ് ഓഫിസര്‍മാര്‍ ഉറപ്പുവരുത്തണമെന്നും കലക്ടര്‍ നിര്‍ദേശിച്ചു.